„ძლიერი საქართველო“ სადეპუტატო მანდატებზე უარს ამბობს

ოპოზიციური კოალიცია „ძლიერი საქართველო“, რომელმაც წარმატებით გადალახა 5%-იანი ბარიერი საპარლამენტო არჩევნებში, უარს ამბობს სადეპუტატო მანდატებზე, განაცხადა კოალიციის ერთ-ერთმა ლიდერმა მამუკა ხაზარაძემ 14 ნოემბერს.

მანამდე ორმა ოპოზიციურმა ძალამ, „კოალიცია ცვლილებისთვის“ და „ერთიანობა-ნაციონალურმა მოძრაობა“ ასევე მიიღო მსგავსი გადაწყვეტილება და ცენტრალურ საარჩევნო კომისიას მათი სადეპუტატო მანდატების გაუქმების თხოვნით მიმართა. იმ ოპოზიციურ პარტიებს შორის, რომელთაც 5%-იანი ბარიერი გადალახეს, მხოლოდ ყოფილი პრემიერ-მინისტრის გიორგი გახარიას პარტიას „საქართველოსთვის“ არ უთქვას ჯერჯერობით უარი მანდატებზე და მხოლოდ ის განაცხადეს, რომ პარლამენტს ლეგიტიმაციას არ მიანიჭებენ.

„გადამწყვეტად მნიშვნელოვანია, რომ არცერთმა პოლიტიკურმა სუბიექტმა, რომელმაც მიიღო წარმომადგენლობითი მანდატი, ლეგიტიმაცია არ მიანიჭოს „ქართული ოცნების“ პარლამენტს და უარი თქვას მისთვის მინიჭებული მანდატების გამოყენებაზე“, – წერს ხაზარაძე სოციალურ ქსელში.

„შესაბამისად, ჩვენ ვთავაზობთ ყველა ძალას, ვისაც მიღებული აქვს მანდატები კანონით განსაზღვრული წესით, ერთობლივად, ერთ დღეს, ერთ დროს განვახორციელოთ ეს პროცედურული ქმედება და ერთად მივმართოთ სიების ჩახსნისა და მანდატების დატოვების მოთხოვნით შესაბამის უწყებებს, ამით წერტილს დავუსვამთ ინტერპრეტაციებს და არ მივცემთ არავის ამ თემაზე სპეკულაციების საშუალებას“, – აცხადებს ხაზარაძე.

მან ასევე განაცხადა, რომ „მეტი საჯაროობისთვის, მზად ვართ, ეს პოლიტიკური აქტი განვახორციელოთ პრეზიდენტთან შეთანხმებით და მისი ჩართულობით“.

26 ოქტომბრის საპარლამენტო არჩევნებზე ოთხმა ოპოზიციურმა ძალამ – კოალიცია ცვლილებისთვის, ერთიანობა-ნაციონალური მოძრაობა, ძლიერი საქართველო და გახარია-საქართველოსთვის – სავალდებულო 5%-იანი ხუთპროცენტიანი ბარიერი გადალახა. თუმცა, ყველა ამბობს, რომ არჩევნები გაყალბდა. ჯერჯერობით ისინი მტკიცედ აცხადებენ უარს დეპუტატის მანდატებზე, თუმცა ამ ძალებს შორის უნდობლობაც საგრძნობია.

პრემიერ-მინისტრმა ირაკლი კობახიძემ 14 ნოემბერს საზოგადოებრივ მაუწყებელთან ინტერვიუში განაცხადა, რომ  „მე მგონია, რომ ბოლოს ყველა შემოვა პარლამენტში… საბოლოო ჯამში ამ პოლიტიკურ პარტიებს არ აქვთ არავითარი რესურსი, მათ შორის ისინი პირველ რიგში პარლამენტს ვერავითარ სიკეთეს ვერ მოუტანენ. იმდენად დესტრუქციულები და რადიკალურები არიან თავის არსით, რომ მათი მონაწილეობა საპარლამენტო ცხოვრებაში მხოლოდ და მხოლოდ კონტრპროდუქტიული იქნება“.

ასევე წაიკითხეთ:

• 2024 წლის 26 ოქტომბრის საპარლამენტო არჩევნები – სიახლეების ბლოგი
• 05/11/2024 – ოპოზიციის სამოქმედო გეგმა წინააღმდეგობითა და ქუჩის პროტესტით გამარჯვების დაბრუნებას ისახავს მიზნად