ქუჩაში ვითარება ჩაცხრა, აგრესიულ ჯგუფთა უმრავლესობა გაუვნებელყოფილია, ყველას მოუწევს ქართველი ხალხის არჩევანის მიღება, რადგანაც ის სრულ სიმართლეზეა დაფუძნებული - შალვა პაპუაშვილი

უკანასკნელი დღეების განმავლობაში ჩვენ ვხედავთ უკვე მშვიდობიანად მიმდინარე, ერთგვარად შეთხელებულ აქციებს, რომელიც გათავისუფლდა პოლიტიკური აქტორების მიერ მობილიზებული აგრესიული ჯგუფებისაგან. დემონსტრაციის ამგვარი ფერისცვალება მართლაც მისასალმებელია და ქვეყანაში მიმდინარე პროცესის პოლიტიკურ კალაპოტში დაბრუნებას ასახავს, – ამის შესახებ საქართველოს პარლამენტის თავმჯდომარე შალვა პაპუაშვილმა განაცხადა.პაპუაშვილის თქმით, ვინც დღეს ქვეყნის არდამშვიდებას და არეულობას უწყობს ხელს, მტრობს ქვეყანას და ქართველ ხალხს.„ჩვენ ვხედავთ იმ ძალებსაც, რომლებსაც არ სურთ საქართველოში მშვიდობა, სიწყნარე, სოლიდარობა და პოლიტიკის კანონის ფარგლებსა და კონსტიტუციურ ჩარჩოებში კეთება.  მოურიდებლად მინდა განვაცხადო, ვინც დღეს ქვეყნის არდამშვიდებას და არეულობას ხელს უწყობს, მტრობს ჩვენს ქვეყანას და ქართველ ხალხს. აქციების დაწყებიდან საკმარისი დრო გავიდა.  მოვისმინეთ პროტესტი, უკმაყოფილება, პრეტენზიები და საყვედურები. მთელი ამ ხნის განმავლობაში ნაბიჯ-ნაბიჯ, მეთოდურად ვცდილობთ, ვუპასუხოთ ყველაფერს.  ვცდილობთ, ავხსნათ, რომ ჩვენს ქვეყანაში მშვიდობიანი პროტესტი და დემონსტრაცია დაცულია, ხოლო პოლიციელებზე თავდასხმა და მასობრივი ძალადობა აუცილებლად აღიკვეთება.  ვცდილობთ, ავხსნათ, რომ არავითარი ჩელიაბინსკი არ არსებობს, არსებობს მხოლოდ საქართველო, მისი დედაქალაქი თბილისი და მთავარი გამზირი – რუსთაველი.  აქ ისევ ისე თენდება და ღამდება.  ქვეყანა, ყველაფრის მიუხედავად, აგრძელებს არჩეული გზით სვლასა და ცხოვრებას, როგორც მანამდე, განვლილი 12 წლის განმავლობაში. ნაბიჯ-ნაბიჯ, მეთოდურად, თანმიმდევრულად, ჩვენ მივყვებით დასახულ მიზნებსა და ამოცანებს.  მივიწევთ წინ ევროინტეგრაციის გზაზე, რომლის აუცილებელი და ფუნდამენტური ნაწილია თავისუფალი და სამართლიანი არჩევნები.  სწორედ ისეთი, როგორიც ჩატარდა 26 ოქტომბერს. ამ არჩევნებში „ქართულმა ოცნებამ“ გაიმარჯვა ხმათა სრული უმრავლესობით, მიიღო მილიონ ასოცი ათასი ხმა, მთლიანი შედეგის 54%.ყველა, ვინც ამტკიცებს, რომ ეს ესე არ მომხდარა, ცრუობს. ის, რომ ვერავითარი მტკიცებულება და საბუთი მათ ვერ წარმოადგინეს, გამქრალ თუ გაჩენილ სამასი ათას ამომრჩეველზე და ელექტრონულ ჩარევებზე, სრულიად ბუნებრივია. ის რაც ბუნებაში არ არსებობს, ვერც გაჩნდება.  სიცრუის ამ კამპანიას ჰყავდა ინიციატორები, ავტორები, გამავრცელებლები და აქტივისტები.  ეს ზუსტად იგივე ხალხია, რომლებიც ასეთივე წარმატებით ატყუებდნენ მათ პოტენციურ ამომრჩეველს 26 ოქტომბრამდეც, რომ ხალხის უმრავლესობა ოპოზიციის მხარესაა, რომ არჩევნებზე ყველაფერი შეიცვლება.  ის ვინც ეს დაიჯერა, მოგვიანებით შიშველი სიმართლის და რეალობის წინაშე დადგნენ და გაოგნდნენ. მათთვის წარმოუდგენელია, რომ წააგეს. ამ რეალობის უარყოფის შედეგია, ის რასაც ჩვენ ამ დღეებშ ქუჩაში ვხედავთ. სინამდვილეში კი, არავინ დამარცხებულა. ყველამ მიიღო მისი კუთვნილი ხმა, პროცენტები და წარმომადგენლობა. ყველას უფლება არის დაცული, ყველას ხმა ისმის. ყველას აქვს საშუალება ,იცხოვროს მშვიდად და პოლიტიკითაც სრულიად კონვენციური ფორმით დაკავდეს. ერთადერთი, ვინც დამარცხდა, არიან საქართველოს მტრები. ისინი, ვისაც არ უნდა ამ ქვეყანაში სიმშვიდე, განვითარება, თანმიმდევრული წინსვლა.ჩვენს მტრებს სურთ ცვლილება ნებისმიერ ფასად. მათ სურთ ეროვნული, კანონიერად არჩეული ხელისუფლების ჩამოგდება ყველა მეთოდის გამოყენებით. დიახ, ეს უთანასწორო ბრძოლაა, მაგრამ ამ ბრძოლაში ჩვენ ზურგს გვიმაგრებს ქართველი ხალხი. ის ვინც გვენდო და ვინც დაუჯერა ჩვენს დღის წესრიგს.  ეს არის ხალხი, რომელიც გონების გარდა, გულითაც გრძნობს უცხოეთიდან თავსმოხვეულ კერპებს. პროტესტის რადიკალური ნაწილის არაადეკვატურობა კუბოების დაწვასა და ვუდუს რიტუალებშიც კი გადაიზარდა, მივიღეთ უცხოელის კერპად  შემრაცხველთა მთელი კოჰორტა, რომელთათვისაც უცხოელის სიტყვაა უზენაესი და უმთავრესი.  სწორედ აქ გადის არსებითი წყალგამყოფი ჩვენსა და რადიკალებს შორის, ვისთვისაც უზენაესია გარე ძლიერი ბატონის ქვეშევრდომობა, თაყვანისცემა და ვისთვისაც ჯერ საკუთარი ქვეყანაა, საკუთარი ეროვნული ინტერესია, საკუთარი თვითმყოფადობა და ვისთვისაც საქართველოა უპირველეს ყოვლისა.  ამაზე დგას „ქართული ოცნება“ და ჩვენ არ დავუშვებთ ქვეყნის გარედან მართვას. ამ უმთავრეს საკითხში ვერ ვთანხმდებით საქართველოს ხელისუფლება და გარედან მართული ოპოზიცია“, – განაცხადა პაპუაშვილმა.როგორც პაპუაშვილმა აღნიშნა, ყველას მოუწევს ქართველი ხალხის არჩევანის მიღება, რადგანაც ის სრულ სიმართლეზეა დაფუძნებული.„ქუჩაში ვითარება ჩაცხრა, აგრესიულ ჯგუფთა უმრავლესობა გაუვნებელყოფილია. ცხოვრება თანდათანობით ჩვეულ რიტმს დაუბრუნდება. ყველას მოუწევს ქართველი ხალხის არჩევანის მიღება და აღიარება, რადგანაც ის სრულ სიმართლეზეა დაფუძნებული. ამ ფონზე ჩვენ ვხედავთ კიდევ ერთ და იმედია უკანასკნელ გაბრძოლებას, საქართველოს გადაკიდებული უცხოელი პოლიტიკოსების ვიზიტს, რომლებიც რუსთაველის გამზირს ისევ წასაქეზებლად ესტუმრნენ.  მათი მიზანია ჩამქვრალ ცეცხლზე ნავთის დასხმა, წაგებულ დღის წესრიგზე ჩაბღაუჭება და შემოტრიალება. რეგიონული ომებისა და კრიზისების ფონზე, ჩვენი უმთავრესი მიზანია ქვეყნის ეროვნული ინტერესის დაცვა, რაც გადის მშვიდობის შენარჩუნებასა და ეკონომიკის გაძლიერებაზე.  ჩვენ მოვდივართ 90-იანი წლებიდან და ზუსტად ვიცით, რა დაუჯდა ქვეყანას გლობალურ კატაკლიზმებში დაუფიქრებლად და გამოუცდელად თავის ამოყოფა.  ეს ახსოვს ხალხს, ამიტომ ესმის ჩვენი. სწორედ ამიტომ ვართ მტკიცედ და ამიტომ არ ვიხევთ უკან ჩვენს გზაზე. ამიტომ არ ვეპუებით მტრებს, რადგანაც ჩვენ უკან ჩვენი ქვეყანა და ქართველი ხალხია. ერთადერთი გულისტკივილი, რასაც განვიცდი, არის იმ ხალხის პოზიცია, რომელიც შეიძლება კრიტიკულადაა განწყობილი, მაგრამ უყვარს თავის ქვეყანა და რთულად ესმის ის გზა, რომელსაც მიჰყვება ხალხის უმრავლესობის მიერ არჩეული ხელისუფლება. დარწმუნებული ვარ, რომ დროთა განმავლობაში ობიექტურად ყველა მიხვდება, თუ რას ვემსახურებით ჩვენ“, – განაცხადა პაპუაშვილმა.