სალომე ზურაბიშვილმა მამუკა ხაზარაძისა და გიორგი გახარიას პარტიების გაერთიანების ჩაშლის მიზეზებად უნდობლობა, ეჭვი და ჩამოუყალიბებელი პოლიტიკური კულტურა დაასახელა

სალომე ზურაბიშვილმა დღევანდელ ბრიფინგზე ის მიზეზები დაასახელა, რის გამოც, მისი აზრით, მამუკა ხაზარაძისა და გიორგი გახარიას პარტიების გაერთიანება არ შედგა.ზურაბიშვილის თქმით, გაერთიანებაზე მოლაპარაკებების ჩაშლა უფრო იყო მოცემულობის ბრალი, იმ წარსულის, რომელიც მძიმედ აწვება ქვეყანაში პრაქტიკულად ყველა პოლიტიკურ მოთამაშეს.„იყო მცდელობა და მგონი, დროულიც და აუცილებელიც. დიპლომატიის, რაც მთავარია, მოლაპარაკებების ის გამოცდილება, რაც მივიღეთ დაახლოებით 30 წლის მანძილზე, მეუბნებოდა, რომ საზოგადოებისგან არსებობდა დაკვეთა – ყველამ ერთად რაღაც ქენით, მოახერხეთ კონსოლიდაცია. არსებობდა შანსი და საერთოდ, წესია მოლაპარაკებებში, რომ ეს შანსი ძლიერდება ბოლოსკენ, როცა უკვე მეტი გასაქანი აღარ გაქვს. ამიტომ საჭირო იყო მცდელობა. მცდელობა ნიშნავს, რომ გარანტირებული არასოდეს არის. უნდა აიღო რაღაც რისკი და რისკი ავიღე. არ გამოვიდა.აქ არ მოვსულვარ საჭორაოდ, გითხრათ, ვისი ბრალი იყო, რომ ჩაიშალა. ალბათ ყველასი და ამავე დროს, არავისი. უფრო იყო მოცემულობის ბრალი, იმ წარსულის, რომელიც მძიმედ აწვება ამ ქვეყანაში პრაქტიკულად ყველა პოლიტიკურ მოთამაშეს და მომავლის, რადგან ყოველთვის არის შიში, მე როგორ დავიცვა ჩემი იდენტობა, მომავალი. ეს მოცემულობა ხელშემშლელია და იქნება ალბათ, რადგან არ გამოვსულვართ ამ მოცემულობიდან. მაგრამ ამ მოცემულობაში ორი მთავარი დამნაშავე არის ერთი მხრივ, პოლიტიკური კულტურა, რომელიც ჯერ არ არის ჩამოყალიბებული, კომპრომისების ძებნის კულტურა, რადგან ჯერ კიდევ არის მიჩნეული, როგორც სისუსტე, თუ დათმობ და რამდენსაც დათმობ და ვინც უფრო დათმობს, ესე იგი,ის უფრო სუსტია. ნათელია, რომ წინასაარჩევნო პერიოდში ეს ძნელი დასაძლევია. მეორე დამნაშავე ამ შემთხვევაში არის ის, რაც ჩვენ ყველას გვჭამს – უნდობლობა, ეჭვი, რომელიც გამძაფრებულია ყველანაირი კონსპირაციული თეორიებით. ეს ყველას გვეხება, მეც მეხება, ყველაზე მოქმედებს და ამდენად, ძალიან ძნელია, რომ გათავისუფლდე ამ ყველაფრისგან. ეს გარემო ძალიან აფერხებს ყველანაირ ძებნას იმ აუცილებელი შეთანხმების, დათმობების, რომლებიც ქმნის საბოლოოდ მოლაპარაკებაზე შედეგს. არ შედგა, არ შედგა და ჩვენ ვართ იმ მომენტში, როცა უნდა ვიყუროთ წინ და დავინახოთ, რომ რაც არ შედგა, ეს ფაქტია, მაგრამ ამ პროცესმა მოიტანა თავისივე შედეგი, ეს უნდა დავინახოთ. თავისივე პოზიტივი, რომელიც არის, რომ ერთი მხრივ, განწყობები შეიცვალა პარტიებს შორის და ის, რაც გუშინ იყო ძალიან რთული, ნელ-ნელა მოლბა და შეიძლება ითქვას, სამომავლო თანამშრომლობა უკვე ბევრად ადვილია. ანუ, იქმნება ახალი პერსპექტივა, რომელიც გვაძლევს სურათს, რომ ცალ-ცალკე გადიან ეს პარტიები, მაგრამ ძალიან ნათლად ჩანს, რომ მიზანი ერთია. ამ დილით ქარტიაზე ხელმოწერილი იქნა მეოთხე პარტიისგან და ეს არის ის, რაც რეალურად ყველაზე მეტად აერთიანებს ამ ოთხს პარტიას. სხვა გამაერთიანებელი არ არსებობს. ეს არის ცემენტი“, - განაცხადა სალომე ზურაბიშვილმა.