პრეზიდენტი უცხოურ ვიზიტებზე, მთავრობის დაკომპლექტებასა და არჩევნებზე საუბრობს

5 ოქტომბერს ტელეკომპანია „პირველთან“ ინტერვიუში, პრეზიდენტმა სალომე ზურაბიშვილმა ევროპაში მის ვიზიტებზე, არჩევნების შემდეგ მთავრობის დაკომპლექტების გეგმებზე, ამჟამინდელი მმართველი პარტიისთვის საჭირო გარანტიების მიცემაზე, ემიგრანტთა მიერ ხმის მიცემასა და არჩევნების შემდეგ ახალი და განვითარებული საქართველოს ფორმირებაში საჯარო მოხელეების როლზე ისაუბრა.

პრეზიდენტს გასულ კვირას ევროპის ქვეყნებში განხორციელებული ვიზიტების შესახებ ჰკითხეს, განსაკუთრებით დასავლეთისგან საქართველოს ხელისუფლების სრული იზოლაციის კონტექსტში. პრეზიდენტმა განაცხადა, რომ მისი ვიზიტის მიზეზი სწორედ ის იყო, რომ საქართველოს ურთიერთობა ყველასთან დანგრეულია და რომ მას უნდა დარწმუნდეს, რომ მას შემდეგ, რაც საქართველოს მოქალაქეები არჩევნების დროს აჩვენებენ, რომ მტკიცედ დგანან ევროკავშირში ინტეგრაციის გზაზე, ევროკავშირი დააბრუნებს ქვეყანას იმ გზაზე, საიდანაც ის „ქართულმა ოცნებამ“ ჩამოაშორა.  

პრეზიდენტმა აღნიშნა, რომ ვიზიტების დროს მან ევროპელი ლიდერებისგან გარანტიები მიიღო იმის თაობაზე, რომ ევროკავშირი საქართველოს ელოდება და თუ ქართველები გადაწყვეტენ, რომ ევროკავშირი საბოლოო მიზანია, უკრაინის გამო საქართველოსთვის მინიჭებული „ღია ფანჯრის“ შესაძლებლობა კვლავ ღიაა და ელოდება მას. მან ასევე განაცხადა, რომ მთავარი მიზანია ამ გზაზე დაბრუნება 2025 წლის ივნისში, როდესაც ევროკავშირის საბჭო საქართველოსთან გაწევრიანების მოლაპარაკებების დაწყების შესახებ გადაწყვეტილებას მიიღებს. სალომე ზურაბიშვილმა ამ პროცესში პოლონეთის პრეზიდენტის დახმარებას გაუსვა ხაზი, რომელსაც ის გასულ კვირას შეხვდა.

პრეზიდენტმა ასევე განაცხადა, რომ „ქართული ოცნების“ კამპანია, რომელიც საქართველოს ევროკავშირთან დაახლოების ცარიელ დაპირებებს ეფუძნება, არის სიცრუე და იმ განცხადებებს ახსენებს, რომელთაც სსრკ აკეთებდა დემოკრატიის შესახებ. მან ასევე ხაზი გაუსვა საბჭოთა კავშირსა და „ქართული ოცნების“ სხვა მსგავსებებს, როგორიცაა ბოლოდროინდელი კამპანიის ბანერები და განაცხადა, რომ მმართველი პარტიის ქმედებები ბოლო წლებში იყო რუსული მოქმედებების სრული ასლი. ზურაბიშვილის თქმით, მას ხშირად ეკითხებიან დასავლელი ლიდერები, როდის მოხდა „ქართული ოცნების“ პოლიტიკაში ეს ცვლილება, თუმცა მას პასუხი არ აქვს, რადგან არ აქვს ფაქტები იმის შესახებ, თუ ვინ არის რუსეთთან შეკრული უხილავი სიმებით და როდიდან ცეკვავს „ქართული ოცნება“ მოსკოვის დაკრულზე.  

ევროპელი ლიდერების გზავნილების განხილვის გარდა, პრეზიდენტმა ყურადღება გაამახვილა აშშ-ის პრეზიდენტის სპეციალურ მრჩეველ მაიკლ კარპენტერთან შეხვედრის დროს მიღებულ გზავნილებზე, და განაცხადა, რომ მას გაუჩნდა განცდა, რომ ამერიკული მხარე თავს იკავებს ბიძინა ივანიშვილის მიმართ სანქციების დაწესებისგან, რათა თავიდან აიცილოს ბრალდებები ქვეყნის შიდა პოლიტიკაში ჩარევის თაობაზე.

პრეზიდენტ ზურაბიშვილს ჰკითხეს, ექნება თუ არა კომუნიკაცია ივანიშვილთან მის მიერ მიღებული დასავლური გზავნილების გასაზიარებლად, რაზეც მან უპასუხა, რომ ამის წინააღმდეგი არ არის, თუმცა, ბოლოს მასთან კომუნიკაცია 2022 წლის ივნისში ჰქონდა და მაშინაც, ივანიშვილმა მიანიშნა, რომ მასთან საუბრის სურვილი არ ჰქონდა. პრეზიდენტს ასევე ჰკითხეს, დასჭირდება თუ არა ივანიშვილს გარკვეული გარანტიები, რომ ის უსაფრთხოდ იქნება არჩევნების შემდეგ, რაზეც ზურაბიშვილმა უპასუხა, რომ არ იცის, არის თუ არა ახლა დრო, რომ მას ასეთი გარანტიები შესთავაზოს.

რაც შეეხება გარანტიებს ზოგადად „ქართული ოცნებისთვის“, პრეზიდენტმა განაცხადა, რომ როგორც პრეზიდენტი გარანტიას იძლევა, რომ ამ პარტიის უფლებებს ოპოზიციაში გადასვლის შემდეგ დაიცავს, ისევე როგორც სხვა პარტიების უფლებებს იცავს. მან იქვე ხაზი გაუსვა, რომ ოთხმა მთავარმა ოპოზიციურმა პარტიამ უნდა მიიღოს საკმარისი ხმები მთავრობის დასაკომპლექტებლად და „ქართული ქარტიით“ გათვალისწინებული მიზნების შესასრულებლად, ხოლო „ქართული ოცნება“ და სხვა მცირე პარტიები ოპოზიციაში იქნებიან და ჯანსაღ პოლიტიკურ გარემოს უზრუნველყოფენ.

რაც შეეხება მთავრობის დაკომპლექტებას, პრეზიდენტმა განაცხადა, რომ უკვე ჰყავს პრემიერ-მინისტრობის კარგი კანდიდატი, რომელსაც არ აქვს პოლიტიკური გამოცდილება და ოპოზიციურ პარტიებთან კონსულტაციების შემდეგ დასახელდება. მან ასევე აღნიშნა, რომ კონსულტაციები მიმდინარე კვირაში დაიწყება.

ბოლოს, პრეზიდენტმა საზღვარგარეთ ხმის მიცემის მსურველ ემიგრანტთა პრობლემებზეც  გაამახვილა ყურადღება და განაცხადა, რომ შეზღუდული რაოდენობის საარჩევნო უბნები სწორედ „ქართული ოცნების“ ინტერესებშია, რადგან მათ ხმას არცერთი ემიგრანტი არ მისცემს. პრეზიდენტმა ხაზგასმით აღნიშნა, რომ საკითხი ჩიხშია შესული, რადგან საგარეო საქმეთა სამინისტრო აცხადებს, რომ მათი კომპეტენცია არ არის ცესკოს მეტი უბნის გახსნის დავალება მისცეს. პრეზიდენტმა ემიგრანტებს მოუწოდა, რომ ყველაფერი გააკეთონ არჩევნებში მონაწილეობისთვის.

ასევე წაიკითხეთ:

• 07/10/2024 – „ქართული ოცნება“ პრეზიდენტ ზურაბიშვილის წინააღმდეგ იმპიჩმენტის მორიგ რაუნდს იწყებს