1 კვირა წინ
9
ევროპარლამენტარების დელეგაციამ 12 დეკემბერს დახურული შეხვედრები გამართა პრეზიდენტთან, ოპოზიციურ კოალიციებთან, არასამთავრობო ორგანიზაციებთან და მედიის წარმომადგენლებთან. მათ ხაზი გაუსვეს სამართლიანი არჩევნებისა და ევროკავშირის უფრო ძლიერი ჩართულობის აუცილებლობას. ევროპარლამენტარებმა ასევე მოითხოვეს ხელახალი არჩევნების ჩატარება, ვინაიდან ოქტომბრის არჩევნები, მათი თქმით, არც თავისუფალი იყო და არც სამართლიანი. ევროპარლამენტარებმა კიდევ ერთხელ დაადასტურეს თავიანთი ერთგულება საქართველოს ევროპული მომავლის მიმართ.
ვიზიტამდე, 11 დეკემბერს, საქართველოში ვიზიტით მყოფმა ევროპარლამენტარმა რასა იუკნევიჩიანემ სოციალურ ქსელში დაწერა, რომ ევროპარლამენტარების ვიზიტი მიზნად ისახავს „ევროპული მომავლისთვის მებრძოლი ქართველების მიმართ სოლიდარობის გამოხატვას“. მან ასევე განაცხადა, რომ ევროპარლამენტის დელეგაცია შეხვდება საქართველოს პრეზიდენტს, სამოქალაქო საზოგადოების ორგანიზაციებსა და მედიის წარმომადგენლებს.
მიუხედავად იმისა, რომ მოლაპარაკებების დეტალები უცნობია, ეს შეხვედრები ხაზს უსვამს იმ ყურადღებას, რომელსაც საქართველო დასავლეთისგან იღებს, ღრმა პოლიტიკური კრიზისის ფონზე.
ზოგიერთმა ევროპარლამენტარმა პრეზიდენტ ზურაბიშვილთან შეხვედრის შემდეგ საკუთარი მოსაზრებები გაახმოვანა. მიჰალ შჩერბამ განაცხადა, რომ საქართველოს კანდიდატი ქვეყნის სტატუსი მიენიჭა გარკვეული პირობებით, რომელთაგან ერთ-ერთი იყო თავისუფალი და სამართლიანი არჩევნების ჩატარება და „უნდა ითქვას, რომ ეს არჩევნები თავისუფალი და სამართლიანი არ ყოფილა“. „ამიტომ, ჩვენ ვთხოვთ საქართველოს ხელისუფლებას, ეს არჩევნები თავიდან ჩაატაროს გარკვეული პირობებით და იმ ნორმების შესაბამისად, რომელსაც ჩვენ ევროკავშირში პატივს ვცემთ“, – განაცხადა მან.
რასა იუკნევიჩიანემ განაცხადა, რომ „ჩვენ ვართ აქ, როგორც ფაქტების დამდგენი მისია, იმისთვის, რომ ვნახოთ სიტუაცია ადგილზე და რა თქმა უნდა, ჩვენი შეხვედრები არის ძალიან მნიშვნელოვანი სწორი დასკვნების საპოვნელად“. მან ასევე აღნიშნა, რომ მისი სურვილია, „ევროკავშირმა იმოქმედოს, უფრო ხმამაღალი და უფრო მეტად მხარდამჭერი იყოს“. „ჩვენ აქ არ ვართ რომელიმე კონკრეტული პოლიტიკური პარტიის მხარდასაჭერად, არამედ ჩვენ აქ ვართ იმისთვის, რომ მხარი დავუჭიროთ საქართველოს, როგორც სახელმწიფოს, რომელიც ახლა ძალიან მნიშვნელოვან და გადამწყვეტ მომენტშია“, – აღნიშნა ევროპარლამენტარმა.
დელეგაციის შემადგენლობაში არიან:
- რასა იუკნევიჩიანე, ლიეტუვა, ევროპის სახალხო პარტია (EPP);
- მიჰალ შჩერბა, პოლონეთი, ევროპის სახალხო პარტია (EPP);
- ნატალი ლუაზო, საფრანგეთი, „განაახლე ევროპა“ (Renew Europe);
- ბერნარ გეტა, საფრანგეთი, „განაახლე ევროპა“ (Renew Europe);
- ტობიას კრემერი, გერმანია, სოციალისტებისა და დემოკრატების პროგრესული ალიანსი;
- რაინიე ვან ლანშოტი, ნიდერლანდები, მწვანეები/ევროპული თავისუფალი ალიანსი.
დელეგაციასთან შეხვედრის შემდეგ კომენტარი არასამთავრობო ორგანიზაციების წარმომადგენლებმაც გააკეთეს. „სამართლიანი არჩევნების“ ხელმძღვანელმა ნინო დოლიძემ აღნიშნა: „ძალიან მნიშვნელოვანია, რომ ევროპარლამენტარები ჩამოვიდნენ საქართველოში. ისინი გამოხატავენ წუხილს და ადასტურებენ ქართველი ხალხის გვერდით ყოფნას ჩვენი დემოკრატიული განვითარებისა და ევროპული მომავლისთვის“. მისი თქმით, დელეგაციას ინფორმაცია მიაწოდეს ადამიანის უფლებების დარღვევებისა და საქართველოში მიმდინარე მოვლენების შესახებ.
ევროპარლამენტის დელეგაციის გარდა, საქართველოს სტუმრობს შვედეთის პარლამენტისა და ევროპის საბჭოს საპარლამენტო ასამბლეის წევრი გუსტავ გეტბერგი. 11 დეკემბერს მან განცხადება გაავრცელა: „ახლახანს ჩამოვედი თბილისში, რათა მხარდაჭერა გამოვხატო ქართველი ხალხის, მისი ევროპული მისწრაფებებისა და მშვიდობიანი პროტესტის უფლების მიმართ“. მან ასევე X-ზე დაწერა: „საქართველო ევროპაა, ევროპა კი საქართველოა – და ვერც ერთი ოლიგარქი ვერ შეცვლის ამ მნიშვნელოვან ფაქტს“.
ასევე წაიკითხეთ:
English (US) · 
Georgian (GE) ·