გურამ მაჭარაშვილი ივანიშვილისა და მაკრონის სატელეფონო საუბარზე: ეს ნიშნავს იმას, რომ ისევე როგორც აშშ-დან, ასევე ევროკავშირიდანაც არის გადატვირთვის მცდელობები

„ქართული ოცნების“ საპატიო თავმჯდომარის ბიძინა ივანიშვილისა და საფრანგეთის პრეზიდენტის, ემანუელ მაკრონის სატელეფონო საუბარი მიუთითებს იმაზე, რომ ისევე როგორც აშშ-დან, ასევე ევროკავშირიდანაც არის გადატვირთვის მცდელობები, განაცხადა „ხალხის ძალის“ წევრმა, დეპუტატმა გურამ მაჭარაშვილმა.„ეს ზუსტად იმას ნიშნავს, რომ, მათ შორის, ევროკავშირიდანაც, როგორც შეერთებული შტატებიდან არის გადატვირთვის მცდელობები. რაც შეეხება იმას, როგორი იყო პროპორციული ძალა პოლიციის აქ, რადიკალური პროცესების დროს, მე მინდა შევახსენო ყველას, მათ შორის, საფრანგეთში რა მოხდა მომიტინგეების დარბევის დროს - ადამიანებიც გარდაიცვალნენ, თუ არ ვცდები 11 ადამიანი, ათასობით ადამიანზე სისხლის სამართლის საქმე აღძრეს და ათასობით დაშავდა. ბიძინა ივანიშვილი გახლავთ მმართველი პარტიის საპატიო თავმჯდომარე, მმართველი პარტიის დამფუძნებელი. ყველამ იცის ეს უცხოეთშიც და საქართველოშიც და ხელისუფლებას თუ არ აღიარებს, მაშინ როგორ დაურეკა მმართველი პარტიის დამფუძნებელს და საპატიო თავმჯდომარეს? ეს ხავსმოკიდებული წინადადებებია რადიკალური ოპოზიციის“, - განაცხადა მაჭარაშვილმა.„ქართული ოცნების“ საპატიო თავმჯდომარეს, ბიძინა ივანიშვილსა და ემანუელ მაკრონს შორის სატელეფონო საუბარი 11 დეკემბერს შედგა.