გიორგი გაბუნია აცხადებს, რომ ტელეკომპანია „მთავარის“ მფლობელმა არხის დახურვა გადაწყვიტა

ტელეკომპანია „მთავარის“ გენერალურმა დირექტორმა, გიორგი გაბუნიამ 11 დეკემბერს განაცხადა, რომ არხის ერთ-ერთმა დამფუძნებელმა ზაზა ოქუაშვილმა გადაწყვიტა, რომ დახუროს ტელეკომპანია. მისი თქმით, არხის მფლობელმა გადაწყვიტა „გააკეთოს ის, რაც ბიძინა ივანიშვილს ძალიან სჭირდება“.  

გაბუნია გენერალურ დირექტორად 2024 წლის თებერვალში დაინიშნა მას შემდეგ, რაც მისი წინამორბედი ნიკა გვარამია ტელეკომპანია „რუსთავი 2“-ში ბიზნეს გარიგებებთან დაკავშირებით სადავო საქმეზე  დააკავეს და 2022 წელს 3.5 წლით თავისუფლების აღკვეთა შეუფარდეს. გვარამია პრეზიდენტმა სალომე ზურაბიშვილმა 2023 წლის ივნისში შეიწყალა და ამჟამად იგი ოპოზიციური „კოალიცია ცვლილებისთვის“ ერთ-ერთი ლიდერია. პოლიტიკური კარიერის დაწყების მიზნით, 2024 წელს, გვარამიამ ტელეკომპანია „მთავარის“ მენეჯმენტი დატოვა და თავისი 12%-იანი წილი მეუღლეს გადასცა. მიმდინარე საპროტესტო აქციების კონტექსტში, გვარამია 4 დეკემბერს მისი პარტიის ოფისის დარბევის შემდეგ დააკავეს და წვრილმანი ხულიგნობისა და პოლიციისადმი დაუმორჩილებლობის ბრალდებით 12-დღიანი პატიმრობა შეუფარდეს.

რა ხდება?

გაბუნიას თქმით, სამი თანადირექტორიდან ერთ-ერთი, გოგი ქურდაძე, მოქმედებდა ოქუაშვილის დავალებით და დაბლოკა მნიშვნელოვანი ფინანსური ოპერაციები და კონტრაქტები, მათ შორის თანამშრომლებისთვის ჯანმრთელობის დაზღვევის ხელშეკრულებები.

გენერალურმა დირექტორმა ოქუაშვილი იმის გამოც გააკრიტიკა, რომ მან პირადი მიზნები არხისა და მისი თანამშრომლების კეთილდღეობაზე მაღლა დააყენა და განაცხადა, რომ თუ ფინანსური ოპერაციების შეჩერება გაგრძელდება, არხი ეთერიდან გაითიშება.

მიუხედავად გამოწვევებისა, გაბუნიამ საზოგადოება დაარწმუნა, რომ არხი რაც შეიძლება დიდხანს გააგრძელებს მუშაობას.

„ჩვენთვის მთავარია, ბოლო წუთამდე ვიდგეთ ჩვენს კოლეგებთან ერთად ყველაზე ცხელ წერტილებში და მოგიყვეთ, რა ხდება იქ, სადაც წყდება საქართველოს ბედი“, – განაცხადა გაბუნიამ.

ასევე წაიკითხეთ:

• 28/02/2024 – ნიკა გვარამიამ „მთავარ არხში“ თანამდებობა და წილები დათმო
• 20/06/2023 – სასამართლომ „რუსთავი 2“-ს გიორგი გაბუნიასთვის კომპენსაციის გადახდა დააკისრა