2 კვირის წინ
24
„ქართულმა ოცნებამ“ შეცვალა გადაწყვეტილება სახელმწიფო უსაფრთხოების სამსახურის მოქმედი უფროსის გრიგოლ ლილუაშვილის ახალი უწყების – რეგიონული განვითარების სამინისტროს ხელმძღვანელად დანიშვნის შესახებ, რადგან „ქართული ოცნების“ პრემიერ-მინისტრმა ირაკლი კობახიძემ განაცხადა, რომ ლილუაშვილის ნაცვლად მინისტრის პოსტს კახაბერ გულედანი დაიკავებს.
კობახიძემ ლილუაშვილი ახალი სამინისტროს ხელმძღვანელობის კანდიდატად 2 აპრილს დაასახელა. მაგრამ ორი დღის შემდეგ, 4 აპრილს, მან განაცხადა, რომ ლილუაშვილთან კონსულტაციების შედეგად გამოვლინდა, რომ მას „განსხვავებული შეხედულებები“ ჰქონდა სამინისტროს მუშაობის პრინციპებზე, მათ შორის განსახორციელებელ საკადრო პოლიტიკაზე.
რეგიონული განვითარების მინისტრობის ახალი კანდიდატი კახაბერ გულედანი 2016-2017 წლებში რეგიონული განვითარებისა და ინფრასტრუქტურის მინისტრის მოადგილის თანამდებობას იკავებდა. ის ასევე მუშაობდა თბილისის მერის მოადგილედ, განაცხადა კობახიძემ გულედანის წარდგენისას, რომელმაც „ქართული ოცნების“ პრემიერ-მინისტრს ნდობისთვის მადლობა გადაუხადა.
დღესვე, „ქართული ოცნების“ პარლამენტმა მხარი დაუჭირა სახელმწიფო უსაფრთხოების სამსახურის უფროსად ანრი ოხანაშვილის არჩევას. მან ამ პოსტზე გრიგოლ ლილუაშვილი შეცვალა. ოხანაშვილი „ქართული ოცნების“ იუსტიციის მინისტრის პოსტს გასული წლის ბოლოდან იკავებდა, მანამდე კი საქართველოს პარლამენტის იურიდიულ საკითხთა კომიტეტს ხელმძღვანელობდა.
ასევე წაიკითხეთ:
English (US) · 
Georgian (GE) ·