მოსამართლეებთან შეხვედრაზე ირაკლი კობახიძე უცხოურ სანქციებს აკრიტიკებს

„ქართული ოცნების“ პრემიერ-მინისტრი ირაკლი კობახიძე 4 აპრილს უზენაესი სასამართლოს მოსამართლეებსა და იუსტიციის უმაღლესი საბჭოს წევრებს შეხვდა. შეხვედრას წინ უძღოდა გაერთიანებული სამეფოს გადაწყვეტილება, რომელმაც ორ ქართველ მოსამართლეს – მიხეილ ჩინჩალაძესა და ლევან მურუსიძეს „სერიოზულ კორუფციაში“ მონაწილეობის გამო სანქციები დაუწესა. შეხვედრაზე კობახიძემ ყურადღება გაამახვილა დასავლელი პარტნიორების მხრიდან საქართველოს სასამართლო სისტემაში „ჩარევის“ სავარაუდო მცდელობებზე. მან შეაქო ქართული სასამართლო სისტემა და მისი დამოუკიდებლობა და უზენაესი სასამართლოს თავმჯდომარე ნინო ქადაგიძესთან მოსამართლეების მიმართ უცხოური სანქციები დაგმო.

აღნიშნა რა, რომ საქართველოს სასამართლო სისტემა საერთაშორისო ზეწოლას განიცდის, რათა უარი თქვას თავის დამოუკიდებლობაზე, კობახიძემ განაცხადა: „ქართული სასამართლო უნდა იყოს დამოუკიდებელი, არის დამოუკიდებელი და მომავალშიც აუცილებლად იქნება დამოუკიდებელი“. მან შეაქო 2012 წელს „ქართული ოცნების“ ხელისუფლებაში მოსვლის შემდეგ არსებული ვითარება საქართველოს სასამართლოში და ასევე ისაუბრა მოსამართლეთა კეთილსინდისიერების შემოწმების, ე.წ ვეტინგის სისტემაზე. მისი თქმით, ამ სისტემით „სინამდვილეში, ჩვენგან, პირდაპირ, მოითხოვდნენ სასამართლოს დამოუკიდებლობის დათმობას“.

კობახიძემ დაგმო მოსამართლეების მურუსიძისა და ჩინჩალაძის წინააღმდეგ დაწესებული სანქციები და გაერთიანებული სამეფოს გადაწყვეტილებას „ტრაგიკული მოვლენა“ უწოდა. იგივე თქვა მან 2023 წელს ქართველ მოსამართლეებზე აშშ-ის მიერ დაწესებულ სანქციებზეც: „ნამდვილად ტრაგიკულია, რომ თომას ჯეფერსონის ქვეყანაში გამოდიან ხელისუფლების წარმომადგენლები, ასანქცირებენ ქართველ მოსამართლეებს და მოგვიანებით გეუბნებიან, რომ არ აქვთ არავითარი მტკიცებულებები. ღია წყაროებიდან, პრესიდან, ტელევიზიებიდან მიიღეს ინფორმაცია გარკვეულ სავარაუდო ქმედებებთან დაკავშირებით, ესეც ტრაგიკულია“. მან მოსამართლეების დასანქცირებას „პოლიტიკური ჩარევის მცდელობა“ უწოდა.

„ვერაფრით ვეგუები და ვერ ვხსნი იმ მოცემულობას, რომ მოსამართლე შეიძლება დასანქცირდეს მხოლოდ იმის გამო, რომ ის თავის პროფესიულ საქმიანობას ახორციელებს“, – განაცხადა უზენაესი სასამართლოს თავმჯდომარემ ნინო ქადაგიძემ.  მისივე თქმით, „განსაკუთრებით შემაშფოთებელი და საწყენია, რომ ზეწოლაა ისეთი სახელმწიფოების, გარე აქტორების მხრიდან, რომელთა დემოკრატიაც დღემდე იდგა მოსამართლის ინდივიდუალური დამოუკიდებლობის დაცვის პრინციპებზე“.

„მინდა, ვთქვა, რომ საბედნიეროდ ზოგიერთებს დაავიწყდათ, რომ ჩვენ ამ შემთხვევაში საქმე გვაქვს ქართველ მოსამართლეებთან, რომელთათვისაც ღირებულია პრიორიტეტები, გააჩნიათ პროფესიული თავმოყვარეობა და მაღალი საზოგადოებრივი პასუხისმგებლობა, ამდენად ჩვენ ეჭვი არ გვეპარება ჩვენი სისტემის მდგრადობაში, ჩემი თითოეული კოლეგის სიმყარეში“, – განაცხადა მან. 

ქადაგიძემ ასევე განაცხადა, რომ სანქციების დაკისრებით „გათვლა კეთდება იმაზე, რომ თვითგადარჩენის ინსტინქტი გაძლიერდეს ინდივიდუალურ მოსამართლეში და ამან უზრუნველყოს ხელისუფლების ერთ-ერთი შტოს შიგნიდან ჩამოშლა“.

ასევე წაიკითხეთ:

• 25/03/2024 – მოსამართლეთა კონფერენციამ „ვეტინგი“ დაგმო და იუსტიციის უმაღლესი საბჭოს ორი წევრი აირჩია
• 13/03/2024 – არასამთავრობოები: ხელისუფლება მოსამართლეთა კეთილსინდისიერების შემოწმებაზე უარით ევროინტეგრაციის პროცესს აფერხებს
• 11/03/2024 – უზენაესი სასამართლო „ვეტინგის“ შესახებ ინიციატივას სასამართლოს დამოუკიდებლობის შელახვის საფრთხედ აფასებს