კობახიძე: ევროკავშირის საგარეო საქმეთა საბჭოს გადაწყვეტილება ანტიქართული ნაბიჯია

პრემიერ-მინისტრმა ირაკლი კობახიძემ 17 დეკემბერს განაცხადა, რომ ევროკავშირის საგარეო საქმეთა საბჭოს 16 ოქტომბრის გადაწყვეტილებას დიპლომატიური პასპორტების მქონე ქართველებისთვის ვიზალიბერალიზაციის შეჩერების თაობაზე მხოლოდ „სიმბოლური დატვირთვა“ აქვს, და მას „ერთმნიშვნელოვნად ანტიქართული ნაბიჯი“ უწოდა. კობახიძემ საგარეო საქმეთა საბჭო გააკრიტიკა და განაცხადა, რომ ასეთი გადაწყვეტილებები ძირს უთხრის ქართულ საზოგადოების ნდობას ევროკავშირის ინსტიტუტების მიმართ.

მთავრობის ადმინისტრაციაში გამართულ ბრიფინგზე მან განაცხადა: „თქვენ იცით, რომ ცოტა ხნის წინ ჩატარდა ევროკავშირის მიერ ევრობარომეტრის კვლევა, რომლის თანახმადაც, ბოლო ექვსი თვის განმავლობაში ევროპული სტრუქტურების მიმართ ნდობა საქართველოში არის შემცირებული 6%. სწორედ ასეთი გადაწყვეტილებები ამცირებს ქართული საზოგადოების ნდობას ევროპული სტრუქტურების მიმართ“, – განაცხადა ირაკლი კობახიძემ.

მან ასევე მადლიერება გამოხატა უნგრეთის, სლოვაკეთის, იტალიის, ესპანეთისა და რუმინეთის მიმართ, რომლებიც შეეწინააღმდეგნენ  საგარეო საქმეთა საბჭოს ზოგიერთი წევრის განზრახვას „ქართული ოცნების“ ოფიციალურ პირებზე სანქციების დაკისრების თაობაზე და „დაიცვეს ქართველი ხალხის ინტერესები“. კობახიძემ ხაზგასმით აღნიშნა, რომ მისი მთავრობა გააგრძელებს კონსულტაციებს ყველა იმ ქვეყანასთან, რომელიც მხარს უჭერს ქართველ ხალხს.

კობახიძემ პარალელი გაავლო საქართველოსა და ევროპული სახელმწიფოების მდგომარეობას შორის. მან ყურადღება გაამახვილა საფრანგეთსა და გერმანიაში არსებულ პოლიტიკურ და ეკონომიკურ გამოწვევებზე, „მყიფე კოალიციებსა“ და „უკრაინასა და სირიაში არსებულ უმძიმეს მდგომარეობაზე“, რაც ევროკავშირისთვისაც პრობლემაა.

მან აღნიშნა, რომ ევროკავშირის ზოგიერთ წევრ ქვეყანას ეკონომიკური სტაბილურობის პრობლემები და ეკონომიკური რეცესიის შემთხვევებიც კი აქვთ.

„საქართველოში ყველაფერი არის კარგად, კონკრეტული ევროპული ქვეყნებისგან განსხვავებით, ჩამოყალიბებულია მყარი უმრავლესობა, პარლამენტი მუშაობს, მთავრობა მუშაობს, პრეზიდენტი დაიწყებს მუშაობას 29 დეკემბრიდან. სწორედ ამას ვერ ეგუებიან კონკრეტული ჩინოვნიკები ევროკავშირში“, – განაცხადა კობახიძემ საქართველოში არსებულ ვითარებაზე საუბრისას.

კობახიძემ კიდევ ერთხელ გაიმეორა თავისი ნარატივი „ლიბერალური ფაშიზმის“ შესახებ და მის დამარცხებას ქვეყნის „ერთ-ერთი ყველაზე მნიშვნელოვანი გამოწვევა“ უწოდა. მან გაამართლა უცხოელი აგენტების შესახებ კანონის მიღება და განაცხადა, რომ ის მიზნად ისახავდა „დაფარული ფულით“ დაფინანსებული რევოლუციების აღკვეთას. „მთავარია, რომ ქართველმა ხალხმა კიდევ ერთხელ არ დაუშვა ამ ქვეყანაში არც „მაიდანი“ და არც რევოლუცია“, – განაცხადა კობახიძემ.

მან უარყო შეშფოთება ზურაბიშვილის წასვლის შემდეგ რაიმე სახის გართულებასთან დაკავშირებით და გაიმეორა, რომ მისი ვადა 29 დეკემბერს დასრულდება და მას „არჩეული პრეზიდენტი მიხეილ ყაველაშვილი“ შეცვლის. კობახიძემ დასძინა, რომ „არავითარი გართულება არ არის მოსალოდნელი“.

ასევე წაიკითხეთ:

• 16/12/2024 – კაია კალასი: დიპლომატებისთვის უვიზო მიმოსვლის შეჩერება „სიმბოლური“ პირველი ნაბიჯია