ვხედავთ მცდელობებს, დაკნინდეს ეუთო/ოდირის როლი, მისი შეფასებების მნიშვნელობა, ეს ქმედებები გამოიყენება საქართველოში ხელოვნური პოლიტიკური კრიზისის, დესტაბილიზაციის შესაქმნელად - მაკა ბოჭორიშვილი

საქართველოს საგარეო საქმეთა მინისტრმა, მაკა ბოჭორიშვილმა ეუთო-ს ასამბლეაზე სიტყვით გამოსვლისას, მადლობა გადაუხადა ეუთო-ს საქართველოს საპარლამენტო არჩევნების დაკვირვებისთვის.როგორც ბოჭორიშვილმა აღნიშნა, არ წყდება სპეკულაციები არჩევნებთან დაკავშირებით, ასევე ჩანს მცდელობები, დაკნინდეს ეუთო/ოდირის როლი, მისი საქმიანობისა და შეფასებების მნიშვნელობა.„მსურს, კიდევ ერთხელ ხაზი გავუსვა იმ პრინციპების დაცვის აუცილებლობას, რაზეც ეს ორგანიზაციაა დაფუძნებული. ვისარგებლებ შემთხვევით და მადლობას გადავუხდი ეუთო-ს საქართველოს მთავრობის მოწვევით საპარლამენტო არჩევნების დაკვირვებისთვის. მიუხედავად იმისა, რომ 2-მა მილიონმა საქართველოს მოქალაქემ უპრეცედენტოდ დიდი რაოდენობის საერთაშორისო თუ ადგილობრივი დამკვირვებლის თანდასწრებით დააფიქსირა საკუთრი არჩევანი, არ წყდება სპეკულაციები არჩევნებთან დაკავშირებით. ვხედავთ ასევე მცდელობებს, დაკნინდეს ეუთო/ოდირის როლი, მისი საქმიანობისა და შეფასებების მნიშვნელობა. ეს ქმედებები გამოიყენება საქართველოში ხელოვნური პოლიტიკური კრიზისისა და დესტაბილიზაციის შესაქმნელად.მოველით, რომ ეუთო/ოდირის საბოლოო დასკვნა დაეფუძნება ობიექტურ შეფასებებს და შესაძლებლობას მოგვცემს, გავაგრძელოთ მუშაობა და თანამშრომლობა რეკომენდაციების შესრულების მიზნით“, – განაცხადა მაკა ბოჭორიშვილმა.