ComCom-მა ITU-ს შეხვედრაზე ციფრული რუკის განვითარების ინიციატივა წარადგინა

ComCom-ის საერთაშორისო ურთიერთობების სამსახურის წარმომადგენელმა, მზია გოგილაშვილმა, ტელეკომუნიკაციის საერთაშორისო კავშირის (ITU) მიერ ბუდაპეშტში გამართულ ევროპის რეგიონული განვითარების ფორუმსა და მსოფლიო ტელეკომუნიკაციების განვითარების კონფერენციის (WTDC) წინამოსამზადებელ რეგიონულ შეხვედრაში (RDF&RPM) მიიღო მონაწილეობა. იგი შეხვედრებში ComCom-ის გარდა, აღმოსავლეთ პარტნიორობის ელექტრონული კომუნიკაციების მარეგულირებელთა ქსელსაც (EaPeReg) წარმოადგენდა.ფორუმზე უნივერსალური დაკავშირებადობის კუთხით, ინფრასტრუქტურის განვითარებისთვის ურთიერთთანამშრომლობის ხელშეწყობის შესახებ გაიმართა პანელური დისკუსია, სადაც მზია გოგილაშვილმა საქართველოსა და აღმოსავლეთ პარტნიორობის ქვეყნების უახლეს მიღწევებზე, ITU-ს, EaPeReg-სა და EMERG-ს (ხმელთაშუა ზღვისა და ევროპის ელექტრონული კომუნიკაციების მარეგულირებელთა ჯგუფი) შორის 2023-2024 წლებში განხორციელებულ სამმხრივ თანამშრომლობასა და ერთობლივ სამომავლო გეგმებზე ისაუბრა. ფორუმში, რომლის ძირითად თემას უნივერსალური დაკავშირებადობა წარმოადგენდა, ITU-ს ევროპის რეგიონის წევრი ქვეყნების ადმინისტრაციებისა და მარეგულირებლების წარმომადგენლები მონაწილეობდნენ.WTDC-ის წინამოსამზადებელი რეგიონული შეხვედრის ფარგლებში კი, კომუნიკაციების კომისიამ, საქართველოს სახელით, ქვეყანაში ფართოზოლოვანი ციფრული რუკის სისტემების განვითარების უზრუნველსაყოფად, ITU-ს ხელშეწყობის თაობაზე წინადადება წარადგინა. ამასთან, ევროპის რეგიონის წევრი ქვეყნების სამომავლო მიზნებსა და საჭიროებებზე დაყრდნობით, მომზადდა დოკუმენტი, რომელიც ITU-ს ევროპის ოფისის მომდევნო 4 წლის სამოქმედო გეგმას დაედება საფუძვლად.ინფორმაციას ComCom-ი ავრცელებს.