რელიგიური და კონსერვატიული ჯგუფები „ოჯახის სიწმინდის დღეს“ აღნიშნავენ

17 მაისს, საქართველოს მართლმადიდებლურმა ეკლესიამ ოჯახის სიწმინდისა და მშობლების პატივისცემის დღე მთელი ქვეყნის მასშტაბით მსვლელობებითა და რელიგიური შეკრებებით, მათ შორის დედაქალაქში მასშტაბური მსვლელობით აღნიშნა.

ღონისძიება რუსთველის გამზირზე მდებარე ქაშვეთის ეკლესიიდან დაიწყო და სამების საკათედრო ტაძრისკენ მსვლელობით გაგრძელდა. ღონისძიებაში მონაწილეობა მიიღეს „ქართული ოცნების“ ხელისუფლების წარმომადგენლებმა, მათ შორის „ქართული ოცნების“ პრემიერ-მინისტრმა ირაკლი კობახიძემ, „ქართული ოცნების“ პარლამენტის თავმჯდომარემ შალვა პაპუაშვილმა და თბილისის მერმა კახა კალაძემ.

გავრცელებული ინფორმაციით, „ქართულმა ოცნებამ“ მნიშვნელოვანი მობილიზაცია უზრუნველყო, მსვლელობაში მონაწილეობისთვის მასწავლებლები და სხვა საჯარო მოხელეები შეკრიბა.

„ქართული ოცნების“ წარმომადგენლებისა და სასულიერო პირების რიტორიკაში ხაზგასმული იყო მიმდინარე გლობალური ბრძოლა „ტრადიციული ღირებულებების წინააღმდეგ“, ასევე ქართული ტრადიციული ღირებულებების დაცვის აუცილებლობა უცხოური მავნე გავლენის წინააღმდეგ.

მსვლელობის დროს ჟურნალისტებთან საუბრისას პრემიერ-მინისტრმა კობახიძემ კიდევ ერთხელ დაადასტურა, რომ მისი მთავრობა ეკლესიასთან თანხვედრაშია „ტრადიციული ღირებულებებისთვის ბრძოლის“ საქმეში. მან ხაზი გაუსვა ქართული საზოგადოების ერთიანობის მნიშვნელობას ტრადიციული ღირებულებებისადმი და აღნიშნა, რომ არიან ძალები, რომლებიც უპირისპირდებიან ამ ყველაფერს, ქმნიან ყალბ იდეოლოგიებსა და ფასეულობებს და ხელისუფლების ვალია, დედა ეკლესიის მხარდამხარ იბრძოლოს ეროვნული ფასეულობების დასაცავად. „ხელისუფლება ბოლომდე იდგება ტრადიციული ფასეულობებისა და ეროვნული  ინტერესების სადარაჯოზე, ჩვენი ვალი და პასუხისმგებლობაა, რომ დედა ეკლესიის მხარდამხარ ვიბრძოლოთ ეროვნული ღირებულებების დასაცავად“, – განაცხადა მან.

„ქართული ოცნების“ პარლამენტის თავმჯდომარემ, რომელიც ასევე ესწრებოდა ღონისძიებას, განაცხადა: „ეს არის ამოძახილი ქართველი ხალხისა იმ ხელოვნური იდეოლოგიის საპირწონედ, რომელსაც ცდილობენ თავს მოახვიონ არა მხოლოდ საქართველოს, არამედ მსოფლიოს სხვადასხვა კუთხეში“.

ქაშუეთის ეკლესიაში წარმოთქმულ ქადაგებაში, პატრიარქის მოსაყდრე, მიტროპოლიტი შიო მიესალმა ხელისუფლების საკანონმდებლო ქმედებებს ლგბტ პირების მიმართ, კერძოდ, 2024 წელს წარდგენილ სადავო საკანონმდებლო პაკეტს.

„ძალიან მნიშვნელოვანია, რომ ჩვენმა ხელისუფლებამ ტრადიციული ღირებულებების დაცვის მიმართულებით ძალიან სასიკეთო და ქმედითი, გაბედული ნაბიჯები გადადგა“, – განაცხადა მიტროპოლიტმა შიომ. „მე ვგულისხმობ შარშან მიღებულ კანონს სოდომური ცოდვის პროპაგანდის წინააღმდეგ და, ასევე, გენდერული იდენტობის ცნების ამოღებას კანონებიდან“.

2024 წლის 17 სექტემბერს „ქართული ოცნების“ პარლამენტმა ლგბტქ+ თემის საწინააღმდეგო საკანონმდებლო პაკეტი მიიღო. პაკეტი მოიცავს ძირითად კანონპროექტს „ოჯახური ღირებულებებისა და არასრულწლოვანთა დაცვის შესახებ“ და საქართველოს სხვადასხვა კანონში შეტანილ 18 ცვლილებას.  

მიტროპოლიტმა შიომ ასევე გააფრთხილა უფრო ფართო იდეოლოგიური ზეწოლის შესახებ და განაცხადა, რომ გარე ძალები ეწინააღმდეგებიან არა მხოლოდ ეკლესიას, არამედ ოჯახსა და ეროვნულ სუვერენიტეტს.

„ეს ძალები ებრძვიან არამარტო ეკლესიას და ეკლესიურ ოჯახებს, არამედ ზოგადად, ტრადიციულ ოჯახს. მინდა, ვთქვა, რომ ისინი სახელმწიფოს, სახელმწიფოს სუვერენიტეტის ცნებასაც ებრძვიან“, – აღნიშნა მან. “არისტოტელე და სხვები წერენ, რომ ოჯახი არის სახელმწიფოს ფუძეც, რომ სახელმწიფო შედგება ოჯახებისგან. ამიტომ საერო ტრადიციაც მსგავს რამეს ამბობს, ჩვენ გვმართებს განსაკუთრებით წინ აღვუდგეთ ამ ტექნოლოგიებს და ამ თეორიებს და თუ რამე უკვე შემოვიდა ჩვენს ქვეყანაში, მაქსიმალურად ვეცადოთ შევაკავოთ და აღმოვფხვრათ ისინი“.

მან დემოგრაფიულ გამოწვევაზეც ისაუბრა და აბორტის შესახებაც ისაუბრა, რა დროსაც განაცხადა, რომ ეს „უმძიმესი ცოდვაა“. მან აბორტების აკრძალვის ზომების მიღებისკენ მოუწოდა და აშშ-სა და ევროკავშირის გამოცდილება მოიყვანა: „ამ მხრივ ბევრი კარგი გამოცდილებაა მოწინავე ქვეყნებში, აშშ-ში, ევროკავშირის ქვეყნებში, სადაც მიღებულია საკანონმდებლო ნორმები, რომლებიც მეტად თუ ნაკლებად ზღუდავს აბორტის გაკეთებას“.

გავრცელებული ინფორმაციით, ოჯახის სიწმინდის დღის მსვლელობის მონაწილეები სიტყვიერად დაუპირისპირდნენ მომიტინგეებს, რომლებიც კვირების განმავლობაში პარლამენტის შენობასთან აქციებს მართავენ. პოლიციის მობილიზება გახდა საჭირო დაპირისპირების თავიდან ასაცილებლად.

2013 წლის 17 მაისს ლგბტ ჯგუფები ჰომოფობიასთან, ტრანსფობიასთან და ბიფობიასთან ბრძოლის საერთაშორისო დღის (IDAHOT) აღსანიშნავად შეიკრიბნენ, მაგრამ ძალადობრივი ჯგუფები, მათ შორის სასულიერო პირები, მათ თავს დაესხნენ. მომდევნო წელს საქართველოს მართლმადიდებელი ეკლესიის პატრიარქმა ილია მეორემ 17 მაისი ოჯახის სიწმინდის დღედ გამოაცხადა, რომელიც მას შემდეგ, ბოლო 11 წელია, აღინიშნება.

ასევე წაიკითხეთ:

• 17/05/2024 – „ოჯახის სიწმინდისა და მშობლების პატივისცემის“ დღესთან დაკავშირებით მსვლელობა გაიმართა
• 18/05/2022 – ლგბტ+ ჯგუფების თავშეკავების ფონზე, მართლმადიდებელმა ეკლესიამ ოჯახის სიწმინდის დღე აღნიშნა 
• 16/12/2021 – სტრასბურგმა საქართველოს მთავრობა 2013 წ. ლგბტ აქტივისტებზე თავდასხმის საქმეზე გაამტყუნა
• 18/05/2019 – მართლმადიდებლური ეკლესიის მრევლის ნაწილმა ოჯახის სიწმინდის დაცვის დღე აღნიშნა