"შოკის ხარისხი შემცირებულია..." - ლევან რატიანის პირველი კომენტარი თორნიკე რიჟვაძის ჯანმრთელობის მდგომარეობაზე

პირველი სამედიცინო კლინიკის დირექტორი, ლევან რატიანი თორნიკე  რიჟვაძის ჯანმრთელობის მდგომარეობასთან დაკავშირებით პირველ კომენტარს აკეთებს. მისი თქმით, პაციენტის მდგომარეობა ოდნავ გაუმჯობესებულია, შოკის ხარისხი შემცირებულია.„პაციენტი შემოყვანილი იქნა დღეს, დილით, დაახლოებით 7-ის ნახევარზე. გადმოყვანილი იქნა სხვა კლინიკიდან. მდგომარეობა შემოსვლისას იყო საკმაოდ მძიმე, ვინაიდან კლინიკურად სახეზე იყო ტრავმულ-ჰემორაგიული შოკის კლინიკა. ამ წუთში მისი მდგომარეობა დადებითი დინამიკით არის, ვინაიდან შოკის ხარისხი შემცირებულია. ჰემოდინამიკის პარამეტრები მეტ-ნაკლებად აღდგენილია. იმყოფება მართვით სუნთქვაზე. უტარდება ის სამკურნალო ღონისძიებები, რაც პროტოკოლით არის გათვალისწინებული“, - განაცხადა ლევან რატიანმა.თორნიკე რიჟვაძე საგარეჯოს „ჯეოჰოსპიტალსში“ ცეცხლნასროლი ჭრილობით დღეს შეიყვანეს. შემდეგ რიჟვაძე პირველ საუნივერსიტეტო კლინიკაში გადაიყვანეს. თორნიკე რიჟვაძის საქმეზე გამოძიება საქართველოს სსკ-ის 115-ე მუხლით არის დაწყებული, რაც თვითმკვლელობამდე მიყვანას გულისხმობს.ამასთან, თორნიკე რიჟვაძის საქმეზე ბრალდებულის სახით დაკავებულია საზღვაო ტრანსპორტის სააგენტოს უფროსი ალექსი ახვლედიანი. შსს-ს ცნობით, ახვლედიანი საქართველოს სისხლის სამართლის კოდექსის 238-ე მუხლით არის დაკავებული, რაც ცეცხლსასროლი იარაღის დაუდევრად შენახვას გულისხმობს.