ყალბი ჩანაწერების მიზანი შეიძლება, ზუსტად ეს იყოს, შემოიტანონ ისტერია, დააბნიონ საზოგადოება, არჩევნებზე მოახდინონ უკანონო გავლენა - შალვა პაპუაშვილი

წინასაარჩევნო გარემო არის უპრეცედენტოდ მშვიდი, ოპოზიციამ ვერ შეძლო, მიუხედავად ბევრი მცდელობისა, რაღაც ისტერია შემოეტანა წინასაარჩევნო გარემოში, ამას ადასტურებს ეუთო/ოდირის შუალედური ანგარიშიც, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.პაპუაშვილის თქმით, არის მცდელობა ისეთი საინფორმაციო ველის შექმნის და დამკვირვებლების დარწმუნების, თითქოს საარჩევნო პერიოდში საქართველოში რაღაც ხდება."ზუსტად ეს შეიძლება იყოს მიზანი, შემოიტანონ ისტერია საზოგადოებაში, დააბნიონ საზოგადოება, არჩევნებზე მოახდინონ უკანონო გავლენა, ამომრჩევლის ნების ფორმირებაზე მოახდინონ გავლენა. რაც შეეხება მეთოდებს, ეუთო/ოდირის შუალედური ანგარიშის გამოქვეყნების შემდეგ ვხედავთ, რომ ოპოზიციისთვის იყო დიდი იმედგაცრუება, მიზანმიმართულად ხდება საინფორმაციო ხმაური და ისეთი საინფორმაციო გარემოს ან ველის შექმნა, რომელმაც უნდა შეუქმნას დამკვირვებლებს აღქმა, თითქოს რაღაც განსაკუთრებული ხდება საქართველოში, ადმინისტრაციული რესურსის თუ ძალადობის სახით. რაც შეეხება ყალბ ჩანაწერებს თუ ფაბრიკაციებს, ზუსტად ეს არის, რომ შექმნან ყალბი ამბავი, რომელიც გამოიწვევს ემოციებს საზოგადოებაში და, შესაბამისად, მოახდენს გავლენას მათ ნებაზე", – განაცხადა შალვა პაპუაშვილმა.შეგახსენებთ, რომ სახელმწიფო უსაფრთხოების სამსახურმა დილით გამოაქვეყნა განცხადება იმის შესახებ, რომ ხელოვნური ინტელექტის მეშვეობით დამონტაჟებული, ფალსიფიცირებული ვიდეო და აუდიო ჩანაწერების გავრცელებას პოლიტიკურ წრეებთან დაკავშირებული ჯგუფები გეგმავენ. მათივე ინფორმაციით, მიზანი ხელისუფლების შტოებს შორის დაპირისპირების გამოწვევა, ხელისუფლებას და მართლმადიდებლურ ეკლესიას შორის შუღლის ჩამოგდება, დასავლელ პარტნიორებთან ურთიერთობის გაუარესება და საპროტესტო მუხტის ხელოვნურად შექმნაა. ამავე განცხადების თანახმად, სუს-ი აკვირდება ამ ჯგუფებს და, კანონდარღვევის შემთხვევაში, ექნება შესაბამისი რეაგირება.