სასამართლომ ივანიშვილის ყოფილ თანაშემწეს 9 000-მდე ბიტკოინის გადახდა დააკისრა

თბილისის საქალაქო სასამართლომ 1 მაისს „ქართული ოცნების“ დამფუძნებლისა და საპატიო თავმჯდომარის, ბიძინა ივანიშვილის ყოფილ თანაშემწეს, გიორგი ბაჩიაშვილს 9000-მდე ბიტკოინის გადახდა დააკისრა, რაც მიმდინარე კურსით დაახლოებით 867 მილიონი აშშ დოლარის ღირებულებისაა.

ბაჩიაშვილს, რომელმაც საქართველო 9 მარტს გირაოს პირობების დარღვევით დატოვა და ამჟამად ემიგრაციაში იმყოფება, შვიდი დღე აქვს გადასახდელად, სანამ ხელისუფლება მისი და მისი ოჯახის წევრების საკუთრებაში არსებული ქონების დაყადაღებას დაიწყებს, განაცხადა მისმა ადვოკატმა, სოფო ქურთაულმა.

სასამართლომ ბაჩიაშვილს მანამდე კრიპტოვალუტის მითვისებისა და ფულის გათეთრების საქმეზე დაუსწრებლად 11 წლით თავისუფლების აღკვეთა მიუსაჯა. 2023 წელს მას 2.5 მილიონი ლარის ოდენობის გირაოს გადახდა დაეკისრა და ქვეყნის დატოვება აეკრძალა.

2025 წლის იანვარში, სასამართლო მოსმენის დროს, ბაჩიაშვილმა განაცხადა, რომ ივანიშვილმა შუამავალი გამოგზავნა წერილით, რომელშიც სისხლისსამართლებრივი დევნის შეწყვეტის სანაცვლოდ კრიპტოვალუტით ყოველთვიურ გადახდებს ითხოვდა. მან არაერთხელ განაცხადა, რომ მის წინააღმდეგ მიმდინარე სამართლებრივი პროცესი „პოლიტიკურად მოტივირებულია“ და პირდაპირ გამოძალვას წარმოადგენს. ივანიშვილის კეთილგანწყობა ბაჩიაშვილმა 2022 წელს დაკარგა.

2025 წლის თებერვალში პროკურატურამ ბაჩიაშვილს ახალი ბრალდება წარუდგინა სამსახურებრივი მოვალეობის შეუსრულებლობის ფაქტზე, რამაც მძიმე შედეგი გამოიწვია. თბილისის საქალაქო სასამართლომ მას 50 000 ლარის ოდენობის გირაო შეუფარდა და ქვეყნიდან გასვლა აუკრძალა. საქართველოს დატოვების შემდეგ, მის წინააღმდეგ კიდევ ერთი საქმე აღიძრა, რომელიც საზღვრის უკანონო გადაკვეთას ეხებოდა.

მისმა უცხოელმა ადვოკატმა, რობერტ ამსტერდამმა, 23 აპრილს განაცხადა, რომ მან ორი უცხოური სადაზვერვო სააგენტოსგან სანდო ინფორმაცია მიიღო, რომელიც ბაჩიაშვილის სიცოცხლისთვის საფრთხის შესახებ აფრთხილებდა.

ასევე წაიკითხეთ:

• 13/03/2025 – დაკავებული ბიზნესმენი ივანიშვილსა და „ქართულ ოცნებას“ რუსეთის სპეცსამსახურებთან კავშირში ადანაშაულებს