რა შანსი აქვს საქართველოს ჯგუფის მოგების, მსოფლიო ჩემპიონატზე გასვლის და რა შემთხვევაში დავქვეითდებით – ყველაფერი ჩეხეთამდე

საქართველოს ნაკრებმა უკრაინასთან საკუთარ მოედანზე მინიმალური მიზანი შეასრულა, არ დამარცხდა და ბოლო ტურის წინ “ერთა ლიგის” B დივიზიონში ჯგუფის მოგების შანსი დაიტოვა, თანაც ისე, საკუთარ თავზე იყოს დამოკიდებული. საწყის ტურებში მოპოვებული ლიდერობის შემდეგ იყო ჩავარდნა, მაგრამ მთავარია, ერთი გამარჯვება, რაგინდ რთული მისაღწევიც არ უნდა იყოს, მთავარ მიზანს შეგვასრულებინებს.
რა არის საქართველოს ნაკრების მთავარი მიზანი? – “ერთა ლიგის” A დივიზიონში პირდაპირ დაწინაურება და მსოფლიო ჩემპიონატზე მოსახვედრ გზაზე პლეი-ოფში მოხვედრა, რისი საკმაოდ დიდი შანსიც ჩვენი ლიგის გამარჯვებულებს აქვთ (A ლიგის გამარჯვებულები მინიმუმ
მეორე ადგილსა და პლეი-ოფს კლასიკური შესარჩევი ეტაპიდანაც მოახერხებენ. შესაძლოა, მათ ჩვენც დავემატოთ).
რა ხდება ბოლო ტურში? თითქოს, ყველაფერი მარტივადაა, უშუალო შეხვედრაში ვუგებთ ამჟამად ლიდედ ჩეხეთის ნაკრებს და პირველობას ჩამოვართმევთ. არის თუ არა სხვა ფაქტორი? ჩვენ მსგავსად, 10 ქულის დაგროვება ალბანელებს (თუკი უკრაინას მოუგებენ) შეუძლიათ. მათთან ურთიერთთამაშების თანაბარი ანგარიში (1:1) გვაქვს, ბურთების შეფარდების კომპონენტში კი საგრძნობი უპირატესობა. საქართველოს ნაკრებს ბალანსი +2 (6:4) აქვს, ალბანეთს კი -1 (3:4). ჩეხეთთან მოგების შემთხვევაში, ჩვენი ბალანსი მინიმუმ +3 იქნება. გამოდის, ალბანელებმა უკრაინას 4 გოლი მაინც უნდა გაუტანონ. ასე რომ, ეს ამბავი ძალიან არარეალურს ჰგავს. თანაც, უკრაინელებს საკუთარი მიზნები გააჩნიათ.
რა მოტივაცია აქვს ჩეხეთს? ჩეხები ფრის შემთხვევაშიც ჯგუფში ჩვენზე წინ ყველა შემთხვევაში იქნებიან, მაგრამ 9 ქულას დააგროვებენ, რაც იმას ნიშნავს, პარალელურად, ალბანეთმა უკრაინა ნებისმიერი ანგარიშით რომ დაამარცხოს, ჯგუფს ალბანელები მოიგებენ. ასე რომ, თავისუფლად შეიძლება, ჩეხებს მოგებაზე “გაწევა” დასჭირდეთ, ეს კი შანსებს კონტრშეტევებზე გაგვიხსნის.
კიდევ რა შანსი არსებობს A დივიზიონში დაწინაურების(და არა მსოფლიო ჩემპიონატზე გასვლის)? ჯგუფში მეორე ადგილი საშუალებას გაძლევს, A ლიგის ჯგუფების რომელიმე მესამეადგილოსანთან პლეი-ოფი ითამაშო. მაგალითად, შეიძლება ეს ბელგია ან სერბეთი იყოს. ჩვენ პირველობაზე ვფიქრობთ, მაგრამ მოგეხსენებათ, ახლა მეორე ადგილზე ვართ და ყველაზე ცოტა, ეს პოზიცია რომ შევინარჩუნოთ, მაშინ ჩეხეთში მინიმუმ, ფრე, აუცილებლად გვჭირდება. ესეც იმ შემთხვევაში გვეყოფა, პარალელური მატჩიც თუ ფრედ დასრულდება. უკრაინის ნაკრები საუკეთესო შემთხვევაში მეორე ადგილზე თუ აღჩნდება.
დარჩა თუ არა შანსი საქართველო ქვედა ლიგაში დაქვეითდეს? პირდაპირ არა, საბედნიეროდ, მეოთხე ადგილზე ვერაფრით გავალთ, თუმცა ამის საფრთხე ჯგუფში მესამეადგილოსნობის შემთხვევაშია. მაშინ დარჩენისთვის ბრძოლა C ლიგის რომელიმე მეორეადგილოსანთან დაგვჭირდება. ეს შეიძლება სლოვაკეთი ან კოსოვო იყოს.
მთავარია, მოკლე დროში გუნდმა ძალების აღდგენა სრულად შეძლოს. დანაკლისს რაც შეეხება, გიორგი გოგჩოლეიშვილმა მეორე გაფრთხილება მიიღო (პირველად ჩეხეთთან თბილისში) და ვერ დაგვეხმარება. დისკვალიფიკაციის შემდეგ ლაშა დვალი ბრუნდება. მნიშვნელოვანი დანაკლისი აქვთ ჩეხებს “ვესტ ჰემელი” სოუჩეკის სახით(შიკი ისედაც აკლდათ).
მადლობას ვუხდით კულტურისა და სპორტის სამინისტროს, ბათუმში განთავსებასა და მატჩის გაშუქებაში რომ დაგვეხმარა. საქართველოს ფეხბურთის ფედერაციისა და საქართველოს სპორტულ ჟურნალისტთა ასოციაციის ერთობლივი პროექტით კი საქართველოს ნაკრებთან ერთად ოლომოუცში გამგზავრების საშუალება გვეძლევა, რაც ძალიან სასიამოვმოა.

იმედია, გამარჯვებული დავბრუნდებით!..