პუტინი ისევ იყენებს ენერგიას იარაღად და ცდილობს ევროპის და ავსტრიის დაშანტაჟებას – ევროკომისიის პრეზიდენტი

ევროკომისიის პრეზიდენტი ურზულა ფონ დერ ლაიენი სოციალურ ქსელ X- ზე (ყოფილი ტვიტერი) გამოეხმაურა რუსული „გაზპრომის“ გადაწყვეტილებას, ავსტრიისთვის გაზმომარაგების შეწყვეტაზე.
„პუტინი ისევ იყენებს ენერგიას იარაღად და ცდილობს ევროპის და ავსტრიის დაშანტაჟებას გაზის მიწოდების შეწყვეტით.“, – წერს ევროკომისიის პრეზიდენტი.
თუმცა, მისივე სიტყვებით, ევროპა მზად არის ამისთვის და მომზადებულია ზამთრისთვის:
„ჩვენი ბუნებრივი აირის მარაგები შევსებულია“, – აცხადებს ფონ დერ ლაიენი.
16 ნოემბერს ავსტრიამ განაცხადა, რომ რუსეთმა მას გაზის მიწოდება შეუწყვიტა.
ეს საარბიტრაჟო სასამართლოს მიერ გამოტანილ გადაწყვეტილებას მოჰყვა ენერგორესურსების ავსტრიული მიმწოდებლის, OMW-ს სასარგებლოდ, რომელიც რუსულ სახელმწიფო კომპანია „გაზპრომს“ მის გერმანულ ქვედანაყოფში გაზის მიწოდების ვალდებულებების შეუსრულებლობაში ადანაშაულებს.
ცოტა ხნით ადრე ავსტრიულმა კომპანია OMV-მ გაავრცელა განცხადება, რომელშიც იყო გაფრთხილება რუსეთიდან გაზის მიწოდების შესაძლო შეწყვეტის შესახებ. კომპანიამ ეს მას შემდეგ განაცხადა, რაც რუსულ „გაზპრომთან“ დავა მოიგო და საარბიტრაჟო სასამართლომ რუსულ კომპანიას 230 მილიონი ევროს გადახდა დააკისრა.
ავსტრია ევროკავშირის იმ მცირერიცხოვან ქვეყნებს შორის ერთ-ერთია, რომელიც ამ დრომდე რუსულ გაზზ იყოა დამოკიდებული. ავსტრიას რუსეთის ბუნებრივი აირი მიეწოდებოდა გაზსადენების მეშვეობით, მათ შორის – უკრაინის ტერიტორიის გავლით. კიევმა არაერთხელ განაცხადა, რომ არსებული კონტრაქტების ამოწურვის შემდეგ, “გაზპრომთან” ხელშეკრულებას არ გაახანგრძლივებს.
წყარო: რადიო თავისუფლება