პრეზიდენტი იტალიის სენატს საქართველოს პოლიტიკურ კრიზისსა და ევროპულ მისწრაფებებზე სიტყვით მიმართავს

პრეზიდენტი სალომე ზურაბიშვილი 20 დეკემბერს იტალიის სენატის საგარეო და თავდაცვის კომიტეტისა და ევროპულ საქმეთა კომიტეტის გაერთიანებულ სხდომაზე სიტყვით გამოვიდა, სადაც დეტალურად მიმოიხილა საქართველოში არსებული პოლიტიკური ვითარება. მან ისაუბრა გაყალბებულ არჩევნებზე, არჩევნების გაყალბებაში ინსტიტუტების ჩართვასა და ქართველი ხალხის ევროპულ მისწრაფებებზე. ზურაბიშვილმა „ქართული ოცნების“ ანტიდემოკრატიული ქმედებები და რიტორიკა გააკრიტიკა და ხაზგასმით აღნიშნა, რომ ბოლოდროინდელი საპროტესტო აქციები მშვიდობიანია და ახალი არჩევნების თაობაზე საქართველოს მოქალაქეების მოთხოვნას ასახავს, რათა „ეს ქვეყანა დარჩეს სტაბილური, დემოკრატიული, თავისუფალი და შევინარჩუნოთ მისი ევროპული გზა“.

ზურაბიშვილმა განაცხადა, რომ 26 ოქტომბრის არჩევნები „რუსულ სტილში“ იყო ორგანიზებული, რომელიც ინსტიტუტების მონაწილეობით მასშტაბურად  გაყალბდა. კერძოდ, პრეზიდენტმა აღნიშნა, რომ სასამართლომ ვერ უზრუნველყო პასუხისმგებელ პირთა პასუხისგებაში მიცემა. მან აღნიშნა, რომ მოსამართლეებმა ვერ შეძლეს ხმის მიცემის ფარულობასთან დაკავშირებული საჩივრების მოგვარება და ხაზგასმით აღნიშნა, რომ ყველა სასამართლო გადაწყვეტილება საარჩევნო კომისიის სასარგებლოდ იქნა მიღებული, რაც ცხადყოფს, რომ საქართველოს სასამართლო სისტემა არ არის სანდო საარჩევნო დარღვევების მოგვარების კონტექსტში.

პრეზიდენტმა ისაუბრა საქართველოს საკონსტიტუციო სასამართლოზე, რომელმაც, მისი თქმით, არჩევნებთან დაკავშირებული საჩივრები არ დააკმაყოფილა. მან ასევე დაგმო „ქართული ოცნების“ გადაწყვეტილება პარლამენტის პირველი სხდომის მოწვევის შესახებ და მას „არაკონსტიტუციური“ უწოდა. ზურაბიშვილის თქმით, პირველი სხდომის მოწვევა მისი, როგორც პრეზიდენტის პრეროგატივა იყო და „ქართული ოცნების“ ეს ნაბიჯი კონსტიტუციის პირდაპირი დარღვევა იყო. მან აღნიშნა, რომ პირველი სხდომა არჩევნების შედეგებთან დაკავშირებით საკონსტიტუციო სასამართლოში შეტანილი საჩივრების განხილვამდე გაიმართა.

რაც შეეხება უფრო ფართო გეოპოლიტიკურ კონტექსტს, ზურაბიშვილმა შეშფოთება გამოთქვა რეგიონში რუსეთის მზარდი გავლენის გამო. მისი თქმით, საქართველოს არჩევნების გაყალბება „ჰიბრიდული ომის“ სტრატეგიის ნაწილი იყო. მას შემდეგ, რაც „ვერ მიაღწია თავის მიზანს უკრაინაში“, რუსეთი ახლა „ცდის ალტერნატივას, რომელიც არის ჰიბრიდული ომი ზოგიერთი მეზობლების წინააღმდეგ და ჩვენ ვართ პირველი საცდელი ადგილი“, – განაცხადა პრეზიდენტმა.

პრეზიდენტმა განაცხადა, რომ საქმე ეხება არა დაპირისპირებას არჩევნების შედეგებზე, არამედ რეალურად კეთდება არჩევანი ევროპასა და რუსეთს შორის. მან გააკრიტიკა „ქართული ოცნების“ მკაფიო მცდელობა, რომ საქართველო „რუსეთის ორბიტისკენ“ უბიძგოს და აღნიშნა, რომ ყველა ინსტიტუტს და მარეგულირებელ კომისიას მმართველი პარტიის მიერ დანიშნული პირები აკონტროლებენ. ზურაბიშვილმა აღნიშნა, რომ იგი ქვეყანაში „უკანასკნელი დამოუკიდებელი ინსტიტუტია“.  

ცოტა ხნის წინ გამართულ საპრეზიდენტო „არჩევნებს“ სალომე ზურაბიშვილმა „პაროდია“ უწოდა. მან ასევე ისაუბრა „ძლიერ ზეწოლაზე“, რომელსაც ოპოზიციური პოლიტიკური პარტიები განიცდიან.

პრეზიდენტმა ასევე დაგმო მმართველი პარტიის მიერ ბოლო ორი წლის განმავლობაში განხორციელებული ქმედებები და ხაზგასმით აღნიშნა, რომ ქართული ოცნების მიერ მიღებული ყოველი გადაწყვეტილება საზიანოა საქართველოს ევროპული მისწრაფებისთვის.

ზურაბიშვილმა თავის სიტყვაში ხაზი გაუსვა რუსეთის მიერ, განსაკუთრებით კავკასიისა და შავი ზღვის რეგიონებისთვის შექმნილ გეოპოლიტიკურ საფრთხეს და საერთაშორისო საზოგადოებას სიფხიზლისკენ მოუწოდა. „გეოპოლიტიკური რუკის სრულიად ახალი რეორგანიზაცია ხდება და რუსეთი ცდილობს ჩაერიოს ამაში“, – განაცხადა პრეზიდენტმა და რუსეთის მიერ საქართველოზე, მოლდოვასა და რუმინეთზე განხორციელებული თავდასხმები ახსენა.

ასევე წაიკითხეთ:

• 19/12/2024 – პრეზიდენტი ზურაბიშვილი: რუსეთი საარჩევნო ომის სტრატეგიას იყენებს
• 18/12/2024 – პრეზიდენტი ზურაბიშვილი ევროპარლამენტში სიტყვით გამოვიდა