პაატა სალია „ნაცმოძრაობის“ რეჟიმზე: არანაირ მოლაპარაკებაზე იმ დროინდელი ხელისუფლება არ შედიოდა და ეს იყო ყველასთვის მკაცრი სიგნალი, რომ რასაც უბრძანებდნენ, ის უნდა განეხორციელებინათ. ასე ითესებოდა შიში

„ჩვენი მიზანი არის გამოვკვეთოთ სისტემური დანაშაული და მაღალი თანამდებობის პირების დანაშაული ამ ქმედებებში“, - განაცხადა საპარლამენტო უმრავლესობის წევრმა პაატა სალიამ, გადაცემაში „დღის ქრონიკა“, „2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი დროებითი საგამოძიებო კომისიის“ სხდომაზე გაჟღერებულ საკითხებთან დაკავშირებით, რომელთა შორის „ნაცმოძრაობის“ რეჟიმის დროს ქონებების უკანონო ჩამორთმევაც იყო.მისი თქმით, ნაცმოძრაობის ხელისუფლების პირობებში სხვადასხვა უწყებები ფაქტობრივად კონკურენციაში შევიდნენ ერთმანეთთან, იმასთან დაკავშირებით თუ ვინ მეტ ქონებას წაართმევდა, როგორც რიგით მოქალაქეებს, ასევე ბიზნესწრეების წარმომადგენლებს.„არსებობდა სისტემა, რომელიც იმართებოდა უმაღლესი ხელისუფლების პირების მიერ და ეს სისტემა იყო შექმნილი იმგვარად, რომ ადამიანებს უკვე პირველივე მოთხოვნისთანავე, ყოველგვარი ვაჭრობის და ფაქტობრივად, პირველივე შეთავაზებისთანავე დაეთმოთ ქონება. იქიდან გამომდინარე, რომ მათთვის შედეგები უკვე წინასწარ ცნობილი იყო და არანაირ მოლაპარაკებაზე, როგორც დღეს გაცხადდა სხდომაზე, იმ დროინდელი ხელისუფლება ვაჭრობაში არ შედიოდა და ეს იყო ყველასთვის მკაცრი სიგნალი, რომ რასაც უბრძანებდნენ, ის უნდა განეხორციელებინათ. ასე ითესებოდა შიში არა მარტო ბიზნესში, ასე იყო პენიტენციურ სისტემაშიც და ასე იყო ყველა სფეროში“, - განაცხადა პაატა სალიამ.ცნობისთვის, დღევანდელ სხდომაზე სამართალწარმოების პროცესში ჩადენილი დანაშაულის გამოძიების დეპარტამენტის უფროსმა ირაკლი ნადარეიშვილმა განაცხადა, რომ დეპარტამენტის შექმნის დღიდან დღემდე დაზარალებულად იქნა ცნობილი 488 პირი, რომელთაგან 335 პირს პროკურატურის შემაჯამებელი გადაწყვეტილების შედეგად დაუბრუნდათ ან დაბრუნების პროცესშია დაახლოებით ‭‭67 000 000 ლარის ღირებულების უძრავი და მოძრავი ქონება.