„იუსტიციის სამინისტროს ეყოლება ახალი ხელმძღვანელი ბატონი პაატა სალიას სახით, რომელიც გამოცდილი იურისტია. ის ჩვენი გუნდის წევრია, მეგობარია და ჩვენ მხოლოდ და მხოლოდ წარმატებას ვუსურვებთ“ - არჩილ გორდულაძე

„ქართული ოცნების" წევრმა, არჩილ გორდულაძემ "ღამის კურიერის" ეთერში მთავრობაში საკადრო ცვლილებებსა და მის მიზეზებზე ისაუბრა. მისი თქმით, მთავრობის პროგრამის მიხედვით, ერთ-ერთი პრიორიტეტული მიმართულება რეგიონების განვითარებაა, რამაც განაპირობა ახალი სახელმწიფო სტრუქტურის შექმნა რეგიონული განვითარების სამინისტროს სახით."ჩვენი მთავრობის პროგრამაში პირდაპირ ასახულია, რომ ჩვენი გუნდი ყველაფერს გააკეთებს იმისთვის, რომ რეგიონული განვითარება იყოს მაქსიმალურად ხელშეწყობილი. ზუსტად იმისთვის, რომ ეს ყველაფერი აღსრულდეს, მნიშვნელოვანია, რომ ცალკე სამინისტროს სახით იყოს შექმნილი სტრუქტურა, რომლის მთავარი მისია იქნება პოლიტიკის ჩამოყალიბება და მისი განხორციელება რეგიონებთან და თვითმმართველობებთან დაკავშირებით. ამ სამინისტროს უხელმძღვანელებს თვითმმართველობის კუთხით განსაკუთრებულად გამოცდილი ადამიანი, რადგან ბატონი გრიგოლ ლილუაშვილი პარლამენტში იკავებდა თვითმმართველობის კომიტეტის თავმჯდომარის მაღალ თანამდებობას, ამასთან, ის იყო ქალაქ თბილისის მერის მოადგილე, მას აქვს უდიდესი გამოცდილება რეგიონულ საქმეების თვალსაზრისით. ამიტომ, მნიშვნელოვანია, რომ ასეთი გამოცდილების ადამიანი იყოს ამ სამინისტროს ხელმძღვანელი.ბატონ გრიგოლს სუს-ის ხელმძღვანელის თანამდებობაზე ვადა ეწურებოდა მიმდინარე წლის ოქტომბერში, შესაბამისად, კანონმდებლობიდან გამომიდინარე, მისი ხელახლა წარდგენა წარმოუდგენელი იყო, კანონდარღვევაა. ამავდროულად, ჩვენი პროგრამის განსაკუთრებით მნიშვნელოვანი ნაწილი იყო რეგიონებზე განსაკუთრებული ყურადღება და აქცენტი. შესაბამისად, ცალკე იქნება სამინისტრო, რომელსაც სწორედ ბატონი გრიგოლი უხელმძღვანელებს. შესაბამისად, სახელმწიფო უსაფრთხოების სამსახურს ეყოლება ახალი ხელმძღვანელი, წინამორბედის მსგავსი ღირსეული ადამიანი, ბატონი ანრი ოხანაშვილი, ჩვენი საპარლამენტო გუნდის ყოფილი წევრი, რომელიც ახლა იკავებს იუსტიციის მინისტრის საკმაოდ საპასუხისმგებლო პოზიციას.ამავდროულად, იუსტიციის სამინისტროს ეყოლება ახალი ხელმძღვანელი ბატონი პაატა სალიას სახით, რომელიც არის გამოცდილი იურისტი. წლების განმავლობაში, ის ადვოკატი იყო და "რუსთავი 2"-სთვისაც ბატონი პაატა სალია უცხო არ არის. პიროვნულადაც, ის ჩვენი გუნდის წევრია, მეგობარია და ჩვენ მხოლოდ და მხოლოდ წარმატებას ვუსურვებთ ჩამოთვლილ ყველა ადამიანს თავიანთ საქმიანობაში, საქვეყნოდ მნიშვნელოვანი საქმეების განხორციელებაში, რადგან თითოეული ეს პოზიცია, რომელიც საქართველოს პრემიერის მიერ იყო გაჟღერებული, უმნიშვნელოვანესია ჩვენი ქვეყნის განვითარებისთვის," - განაცხადა არჩილ გორდულაძემ.