1 კვირა წინ
8
თბილისის სააპელაციო სასამართლომ დაკავებულ თემურ ქათამაძეს (იგივე გაფარ ილმაზი), ქართული წარმოშობის თურქეთის მოქალაქეს, ლტოლვილის ან ჰუმანიტარული სტატუსის მინიჭებაზე უარი უთხრა, რაც მის თურქეთში დეპორტაციას ნიშნავს. 57 წლის ქათამაძეს „ბათუმელ მედროშედ“ იცნობენ, რადგან ბათუმის საპროტესტო აქციების დროს მას მუდამ საქართველოს დროშა ეკავა ხელში და პრო-ევროპულ აქციებს უძღვებოდა. იგი საქართველოში 2012 წლიდან ცხოვრობს.
ქათამაძის ინტერესების დამცველმა, საქართველოს ახალგაზრდა იურისტთა ასოციაციის ადვოკატმა მარიამ გაბროშვილმა რადიო თავისუფლების ქართულ სამსახურს უთხრა, რომ თბილისის საქალაქო სასამართლოს მსგავსად, სააპელაციო სასამართლომაც არ დააკმაყოფილა მისი განაცხადი სტატუსის მინიჭებაზე. შედეგად, ქათამაძეს, სავარაუდოდ, დეპორტაცია ემუქრება.
გაბროშვილის თქმით, ქათამაძე მიიჩნევს, რომ მისი დაპატიმრება მისი ორმოცწლიანი საქმიანობის შედეგია. „ის ქართული დიასპორის უფლებებს იცავდა. ყოველთვის იყო თურქეთის სახელმწიფოს სამიზნეში. ამიტომ ფიქრობს, რომ იქ დააკავებენ“, – ამბობს მარიამ გაბროშვილი. ადრე გავრცელებული ინფორმაციით, ქათამაძეს 2023 წელს აცნობეს, რომ თურქეთში შესვლის შემთხვევაში, მას დააპატიმრებდნენ აწ უკვე გარდაცვლილი ფეთჰულაჰ გიულენის (თურქეთის მთავრობის მიერ მტრად გამოცხადებული პოლიტიკური ოპონენტის) მხარდაჭერისთვის და რომ მისი სიცოცხლე საფრთხეში აღმოჩნდებოდა. ქათამაძე ამბობს, რომ ეს ამბავი შეთხზულია, რაც ადრე მისმა ადვოკატმაც დაადასტურა.
18 მარტს, თბილისის საქალაქო სასამართლოს მოსამართლე დიანა პარკოსაძემ არ დააკმაყოფილა ქათამაძის თხოვნა ლტოლვილის სტატუსის მინიჭების თაობაზე. სოციალური სამართლიანობის ცენტრმა, რომელმაც ქათამაძის საქმეზე თბილისის საქალაქო სასამართლოს სასამართლო მეგობრის მოსაზრება (Amicus curiae) წარუდგინა, გააფრთხილა, რომ ქათამაძის დეპორტაცია მას „წამებისა და დისკრიმინაციის“ საფრთხეს შეუქმნიდა.
ქათამაძე 16 იანვარს დააკავეს და შინაგან საქმეთა სამინისტროს მიგრაციის დეპარტამენტის დროებითი დაკავების იზოლატორში მოათავსეს. ის 48 დღის განმავლობაში შიმშილობდა, რამაც მისი ჯანმრთელობის მდგომარეობის სერიოზული გაუარესება გამოიწვია.
ასევე წაიკითხეთ:
English (US) · 
Georgian (GE) ·