თბილისის მერმა ისნის რაიონში ახალაშენებული საბავშვო ბაღი დაათვალიერა

თბილისის მერმა კახა კალაძემ, დედაქალაქის საკრებულოს თავმჯდომარე გიორგი ტყემალაძესთან ერთად, ისნის რაიონში ახალაშენებული საბავშვო ბაღი დაათვალიერა. N124 ბაგა-ბაღი ვაზისუბნის დასახლებაში, აშოტ კურაპალატის ქუჩაზე აშენდა და აღსაზრდელების პირველი ნაკადი 16 სექტემბერს მიიღო.
„ისნის რაიონში კიდევ ერთი ახალი ბაღი ავაშენეთ, რაც ძალიან მნიშვნელოვანია ადგილობრივი მოსახლეობისთვის. ბაღი 290 ბავშვზეა გათვლილი. ამჟამად 150 ადგილია შევსებული და რეგისტრაცია ეტაპობრივად გრძელდება. გვინდა, რომ ჩვენს პატარებს ასეთ გარემოში უწევდეთ ყოფნა. ბაღი თანამედროვე სტანდარტებითაა აშენებული, სადაც თითოეულ დეტალს განსაკუთრებული ყურადღება ექცევა. სათამაშოები, თეთრეული, ყველაფერი ეკოლოგიურად სუფთა, სერტიფიცირებული და ევროპულია. ბაღში არის ოთხჯერადი კვება, რომელიც უმაღლეს დონეზეა. ჩვენ კიდევ გვაქვს დაგეგმილი ასეთი პროექტები, რაც მნიშვნელოვანია ჩვენი შვილებისთვის. ყველაზე მთავარია ის, რომ 2012 წელს, როდესაც ჩვენ მოვედით ხელისუფლებაში, განვახორციელეთ საკანონმდებლო ცვლილება და საჯარო ბაგა-ბაღები არის უფასო”, – განაცხადა კახა კალაძემ.
ბაღი 9-ჯგუფიანია და 290 აღსაზრდელზეა გათვლილი, ადაპტირებულია შშმ პირთათვის, აქვს კეთილმოწყობილი ეზო გამწვანებითა და სათამაშო მოედნებით; შენობა აღჭურვილია ვიდეოსამეთვალყურეო და სახანძრო უსაფრთხოების სისტემებით, უსაფრთხოების ბადეებითა და სააღმზრდელო ჯგუფების ინდივიდუალური საევაკუაციო კიბეებით. პროექტის ბიუჯეტი 4,5 მილიონი ლარია.
ახალგახსნილ საბავშვო ბაღში მერთან ერთად მერის მოადგილე კახა გულედანი და საბავშვო ბაგა-ბაღების მართვის სააგენტოს ხელმძღვანელი კახა აბულაძე იმყოფებოდნენ.
ინფორმაციას თბილისის მერიის პრესსამსახური ავრცელებს