თბილისის მერიამ ჩინეთში წარმოებული მეტროს ვაგონები შეუკვეთა

თბილისის მერმა კახა კალაძემ 10 ივლისს განაცხადა, რომ 150 მილიონი აშშ დოლარის ოდენობის ტენდერში ადგილობრივმა კომპანიამ GT Group-მა გაიმარჯვა, რომელიც მერიას ჩინეთის უმსხვილესი სარკინიგზო მწარმოებლის, CRRC-ის ვაგონებს მიაწვდის.

მანამდე, დაახლოებით ორი წლის წინ, რუსული კომპანია „მეტროვაგონმაშისგან“ ვაგონების შესყიდვის შესახებ გარიგება, რომელიც EBRD-ის მიერ ფინანსდებოდა, ჩაიშალა რუსეთის მიერ უკრაინაში სრულმასშტაბიანი შეჭრისა და შემდგომი დასავლური სანქციების ფონზე. ახალ პროექტს აზიის ინფრასტრუქტურის საინვესტიციო ბანკი (AIIB) აფინანსებს და 111 ვაგონის მიწოდება, სავარაუდოდ, მომავალი წლის ნოემბერში დაიწყება.