ვალერი გელაშვილი: 2013 წლის დასაწყისში, ლიეტუვის სეიმში საპარლამენტო დელეგაცია ვიყავით და ჩემს თავდასხმაზე საუბრისას, გიორგი ვაშაძემ მითხრა, აბა რა გეგონა, შეურაცხყოფა რომ მიაყენე პრეზიდენტსო - მათთვის ესე იგი, ნორმაა ადამიანების წიხლებით ცემა

2003–2012 წლებში მოქმედი რეჟიმის, ამ რეჟიმის პოლიტიკური თანამდებობის პირებისა და პოლიტიკურ პარტიებში გაერთიანებული მოქმედი და ყოფილი თანამდებობის პირების 2003 წლიდან დღემდე საქმიანობის შემსწავლელი საქართველოს პარლამენტის დროებითი საგამოძიებო კომისიის სხდომაზე, პარლამენტის ყოფილმა წევრმა, ვალერი გელაშვილმა, "ნაციონალური მოძრაობის" რეჟიმის მიერ მისი ცემისა და უფლებების შელახვის თაობაზე ისაუბრა.მან გაიხსენა ერთ-ერთი ფაქტი, როდესაც 2013 წელს, გიორგი ვაშაძემ უთხრა, პრეზიდენტის შეურაცხყოფის გამო აბა რა გეგონაო."ერთი ფაქტი იყო, 2013 წლის დასაწყისში, საპარლამენტო დელეგაცია ვიყავით ლიეტუვის სეიმში წასული, მაშინ დათო უსუფაშვილი იყო პარლამენტის თავმჯდომარე. ჩემს თავდასხმაზე რაღაცაზე ვსაუბრობდით და გიორგი ვაშაძემ მითხრა, აბა რა გეგონა, შეურაცხყოფა რომ მიაყენე პრეზიდენტსო. პარლამენტში ვიყავით, თორემ პასუხს გავცემდი ვაშაძეს. მათთვის ესე იგი ნორმაა ადამიანების წიხლებით ცემა." - განაცხადა ვალერი გელაშვილმა.