ესპანეთმა, ბანკების ჭარბ მოგებაზე გადასახადი გაახანგრძლივა და განაკვეთი 7%-მდე გაზარდა

ესპანეთის მთავრობამ გაახანგრძლივა გადასახადი ბანკების ჭარბ მოგებაზე და ამავდროულად გაზარდა გადასახადის განაკვეთი. თავდაპირველად გათვალისწინებული იყო, რომ ასეთი გადასახადის შემოღება იქნებოდა ერთჯერადი ღონისძიება, რომელსაც ვადა 2024 წლის 31 დეკემბერს ეწურებოდა. ახლა მთავრობამ ის კიდევ სამი წლით გაახანგრძლივა და უმსხვილესი ბანკებისთვის განაკვეთი 4,8%-დან 7%-მდე გაზარდა.
ხელისუფლება ამტკიცებს, რომ ბანკებმა ბოლო წლებში, ჭარბი შემოსავალი მიიღეს მაღალი საპროცენტო განაკვეთების წყალობით. ფინანსური ინსტიტუტები კი ამბობენ, რომ მათი შემოსავლის ზრდა არის კომპენსაცია იმ წლებისთვის, როდესაც ევროზონაში განაკვეთები ძალიან დაბალი და უარყოფითიც კი იყო.
ახალი გადასახადის განაკვეთი შეეხება ბანკებს, რომელთა საპროცენტო და საკომისიო შემოსავალი აღემატება წელიწადში 5 მილიარდ ევროს. ეს ეხება, კერძოდ, ბანკებს, როგორიცაა Banco Santander SA და BBVA SA, მათი აქციები შესაბამისად კარგავს 4%-ს და 2.6%-ს.
ესპანურმა საბანკო ასოციაციამ AEB-მ და CECA-მ გამოაქვეყნეს ერთობლივი განცხადება, სადაც ნათქვამია, რომ ასეთ გადასახადს ანალოგი არ აქვს ევროკავშირის სხვა ქვეყნებში და აზიანებს ესპანეთის საკრედიტო ინსტიტუტების კონკურენტუნარიანობას და მთლიანად ქვეყნის ეკონომიკას.