ევროკავშირმა შავი ზღვის რეგიონის მიმართ ახალი სტრატეგიული მიდგომა წარადგინა

ევროკომისიამ და ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში ევროპარლამენტისა და საბჭოსადმი ერთობლივი კომუნიკაცია გამოაქვეყნეს, რომელშიც შავი ზღვის რეგიონის მიმართ ევროკავშირის სტრატეგიული მიდგომააა აღწერილი. დოკუმენტში ნათქვამია, რომ „ევროკავშირი აძლიერებს თავის ქმედებებს ყოვლისმომცველი მიდგომით“ და ხაზგასმულია შავი ზღვის რეგიონის „მნიშვნელოვანი გეოსტრატეგიული მნიშვნელობა“. დოკუმენტში ნათქვამია, რომ ბლოკი ერთგულად დაუჭერს მხარს რეგიონის დემოკრატიულ მდგრადობას, რომელიც „სასიცოცხლოდ მნიშვნელოვანია ევროპის სტაბილურობისა და კეთილდღეობისთვის“, და „დაიცავს ევროკავშირის ინტერესებს“.

დოკუმენტში ხაზგასმულია შავი ზღვის რეგიონის, როგორც ევროპისა და აზიის დამაკავშირებელი ხიდის მნიშვნელობა, „ეკონომიკური განვითარების გამოუყენებელი პოტენციალით, სტრატეგიული სატრანზიტო მარშრუტებით, განსაკუთრებით ენერგორესურსებსა და კრიტიკულ ნედლეულზე წვდომისთვის“.

ასევე ხაზგასმულია, რომ ევროკავშირი „კვლავაც დაუჭერს მხარს უკრაინასა და მის მეზობლებს მათი დამოუკიდებლობის, სუვერენიტეტისა და ტერიტორიული მთლიანობის დაცვით, მშვიდობისა და დიალოგის ხელშეწყობით, უსაფრთხოების გარანტიების უზრუნველყოფით და აღდგენისა და რეკონსტრუქციის ხელშეწყობით“.

საქართველო ერთობლივ კომუნიკაციაში

მიუხედავად იმისა, რომ საქართველო უკრაინასთან და მოლდოვასთან ერთად რეგიონულ პარტნიორადაა მოხსენიებული, ანგარიშში აღნიშნულია, რომ საქართველო ამჟამად ევროკავშირის გზაზე არ დგას: „ევროკავშირის როლი და პასუხისმგებლობა შავი ზღვის რეგიონში იზრდება, განსაკუთრებით უკრაინასთან, მოლდოვის რესპუბლიკასთან გაწევრიანების მოლაპარაკებების დაწყების შემდეგ; და საქართველოსთან, თუ ქვეყანა ევროკავშირის გზას დაუბრუნდება“, – ნათქვამია დოკუმენტში.

ევროკავშირის უახლესი სტრატეგიული მიდგომა ასევე ხაზს უსვამს საქართველოს მიმდინარე როლს რამდენიმე მნიშვნელოვან მექანიზმში, როგორიცაა ასოცირების შეთანხმება, ღრმა და ყოვლისმომცველი თავისუფალი სავაჭრო სივრცე (DCFTA), აღმოსავლეთ პარტნიორობა და Interreg NEXT შავი ზღვის აუზის პროგრამა, რაც ადასტურებს, რომ საქართველო კვლავაც მნიშვნელოვანია უფრო ფართო რეგიონული თანამშრომლობისთვის.

ასევე წაიკითხეთ:

• 29/04/2025 – ევროკავშირი საქართველოსთვის უვიზო მიმოსვლის შეჩერებას განიხილავს, თავისუფალი ვაჭრობისა და კანდიდატის სტატუსის გადახედვას გეგმავს
• 02/04/2025 – ევროკავშირი: მიღებული კანონები არყევს დემოკრატიის საფუძვლებს საქართველოში
• 01/12/2024 – ევროკავშირის ლიდერები „წუხილს გამოთქვამენ“ ქართული ოცნების გადაწყვეტილების გამო
• 08/10/2024 – დემოკრატიის უკუსვლის გამო საქართველო 121 მილიონი ევროს ოდენობით ევროკავშირის დახმარებას დაკარგავს  
• 30/10/2024 – ევროკომისიამ გაფართოების მეორე ანგარიში გამოაქვეყნა