ევროკავშირი: მიღებული კანონები არყევს დემოკრატიის საფუძვლებს საქართველოში

2 აპრილს გამოქვეყნებულ ერთობლივ განცხადებაში, ევროკავშირის უმაღლესმა წარმომადგენელმა, ევროკომისიის ვიცე-პრეზიდენტმა კაია კალასმა და გაფართოების საკითხებში ევროკავშირის კომისარმა მარტა კოსმა „ქართული ოცნების“ მიერ უცხოელი აგენტების რეგისტრაციის აქტისა და მაუწყებლობის შესახებ კანონში ცვლილებების მიღება გააკრიტიკეს.

მათი თქმით, ახალი კანონები, რომელიც პარლამენტმა სათანადო საჯარო კონსულტაციების გარეშე მიიღო, საქართველოს ხელისუფლებას „განსხვავებული აზრის დასათრგუნად და რეპრესიების პოლიტიკის გასამკაცრებლად დამატებით ინსტრუმენტებს აძლევს“. „ეს ნაბიჯები კიდევ უფრო მეტად არყევს დემოკრატიის საფუძვლებს საქართველოში“, – აცხადებენ ისინი.

„ეს კანონები სამოქალაქო აქტივისტების მუშაობას სტიგმატიზების რისკის ქვეშ აყენებს, საფრთხეს უქმნის სამოქალაქო საზოგადოებისა და დამოუკიდებელი მედიის არსებობის გაგრძელებას, უკან ხევს ადამიანის უფლებების დაცვას, არასათანადოდ ზღუდავს ფუნდამენტურ თავისუფლებებს და ძირს უთხრის დემოკრატიულ პრინციპებზე დაფუძნებულ გადაწყვეტილებების მიღებას“, – ნათქვამია განცხადებაში. „ასეთი ქმედებები არსებითად შეუთავსებელია ევროკავშირის ღირებულებებთან, როგორიცაა დემოკრატია, კანონის უზენაესობა და მედიის პლურალიზმი და შორს არის იმისგან, რასაც კანდიდატი ქვეყნისგან მოველით“. განცხადებაში ხაზგასმულია, რომ „ეს ნაბიჯები უარყოფითად იმოქმედებს საქართველოს ევროკავშირისკენ მიმავალ გზაზე. ევროკავშირის ამ ღირებულებების გაზიარება სავალდებულოა“.

აღნიშნეს რა, რომ საქართველოს მოსახლეობის დიდი უმრავლესობა ქვეყნის ევროკავშირში გაწევრიანების მომხრეა, კალასმა და კოსმა მოუწოდეს ხელისუფლებას, „აჩვენოს, რომ ის ევროკავშირისკენ მიმავალ გზაზე სვლას ჭეშმარიტად და შეუქცევადად უბრუნდება“. „ამისთვის საჭიროა, რომ შეწყდეს მოქალაქეების მიმართ ძალადობა, გათავისუფლდნენ უსამართლოდ დაკავებულები, შეჩერდეს რეპრესიული კანონები, შედგეს ვენეციის კომისიასთან კონსულტაციები და გაიმართოს არსებითი დიალოგი სამოქალაქო საზოგადოებასთან და ყველა პოლიტიკურ აქტორთან მიმდინარე კრიზისიდან გამოსავლის მოსაძებნად“, – ნათქვამია განცხადებაში.

„საქართველოს დაბრუნება ევროკავშირში გაწევრიანების გზაზე სრულად ქვეყნის ხელისუფლების ხელშია“, – აცხადებენ ისინი. „ევროკავშირი მზად არის მხარი დაუჭიროს საქართველოს მოსახლეობის ევროპულ მისწრაფებებს და საქართველოს დემოკრატიული, სტაბილური და ევროპული მომავლისკენ მიმართულ ყველა ძალისხმევას“.

ასევე წაიკითხეთ:

• 01/04/2025 – „ქართული ოცნების“ პარლამენტმა რიგი შემზღუდველი საკანონმდებლო ცვლილებები მესამე მოსმენით მიიღო
• 28/03/2025 – „ქართული ოცნების“ მიერ დაინიცირებული კანონპროექტი ნაციონალური მოძრაობის „მემკვიდრე პარტიების არაკონსტიტუციურად გამოცხადებას“ ითვალისწინებს
• 06/02/2025 – „ქართული ოცნების“ პარლამენტმა რეპრესიული ცვლილებები მესამე მოსმენით მიიღო