დღეს საქართველოს ნაკრებს დიდი მიზანი აქვს – მოგება და ელიტარული დივიზიონი!

არ ვიცით, ეს სექტემბერში რამდენად ჩანდა, როცა პირველ ტურში, თბილისში საქართველოს ნაკრებმა ჩეხები დიდი ანგარიშით (4:1) დაამარცხა, მაგრამ ფაქტია, ეს გუნდები უკანასკნელ ტურში გადამწყვეტ შეხვედრას თამაშობენ, გამარჯვებული კი, თუკი სასწაული არ მოხდა, პირველობას გაინაღდებს.
სამშაბათი, 19 ნოემბერი, 23:45 სთ (თბილისის დრო) – ჩეხეთი VS საქართველო

ეს ნაკრები ერთმანეთს ივნისში, ევროპის ჩემპიონატზე შეხვდნენ, სადაც გიორგი მამარდაშვილის ნამდვილი გმირობა ვნახეთ. თბილისური მატჩის სტარტი თითქოს იქაურს ჰგავდა, ამის შემდეგ კი უპირატესობას ვილი სანიოლის გუნდი დაეუფლა, მეორე ტაიმის 13-წუთიან მონაკვეთში (53-66 წთ) კი სამი
გოლის გატანაც შეძლო.
შესაძლოა, მოგების გარდა ნებისმიერი შედეგით, საქართველოს ნაკრებმა ჯგუფში საწყისი ორი ადგილი ვერ დაიკავოს და B დივიზიონში დასარჩენად პლეი-ოფი დასჭირდეს. ჯგუფი ძალიან დაძაბულია.
“ლევერკუზენის” ფორვარდ შიკის არყოფნას ჩორის დისკვალიფიკაციაც დაემატა და ჩეხებს წინ ძალიან უჭირთ. შემდეგ მატჩს ტომას სოუჩეკიც გამოტოვებს. ტრავმირებულებია დაცვაში. “ჯვაროსნების” მთავარი დანაკლისი საბა გოგლიჩიძეა.
გიორგი მიქაუტაძე უკრაინასთან სათადარიგოთა შორის იყო, მე-15 სანაკრებო გოლი გაიტანა, ამით ალექსანდრე იაშვილის მიღწევა გაიმეორა და ჩეხეთში პირველივე წუთებიდან ვიხილავთ. გასულ ტურში ძალიან მაგარი მატჩები ჰქონდათ ნაკრების ლიდერებს, ხვიჩა კვარაცხელიასა (მას “ერთა ლიგაზე” ზოგადად, ბევრი გააქვს, მიმდინარეზე კი მის ანგარიშზე ჩეხებთან შესრულებული პენალტია) და გიორგი მამარდაშვილს; ოთარ კიტეიშვილის როლი კვლავ დიდი იქნება…
საქართველოს ნაკრების სავარაუდო შემადგენლობა:

მამარდაშვილი – გველესიანი, კაშია, დვალი – კაკაბაძე, ქოჩორაშვილი, კიტეიშვილი, წიტაიშვილი (ან ლოჩოშვილი) – ჩაკვეტაძე – კვარაცხელია, მიქაუტაძე
მსაჯი: პაპაპეტროუ (საბერძნეთი)
ზივზივაძეს ნაკრებში დამსახურებას არ ვუკარგავ, მაგრამ ფაქტია რომ რაღაც აკლია.
ზივზივაძე და მიქაუტაძე დაახლოებით ერთი სტილის ფეხბურთელები არიან, ორივე ფორვარდია და შანსის ფეხბურთელები არიან, თუმცა მიქაუტაძეს აშკარად უფრო დიდი ალღო აქვს გოლის გატანის, და როდესაც სანიოლმა ორი ერთი სტილის ფეხბურთელი ალბანეთთან დააყენა, დიდი შეცდომა იყო, დაიკარგა მრავალფეროვნება და ამ ორი ფეხბურთელის მაქსიმალური დახარჯვა ვერ მოხერხდა და ფაქტიურად 10 ფეხბურთლით ვთამაშობდით – ხან მიქაუტაძეს არ ქონდა საქმე და ხან ზივზივაძეს. ოქ, ჩავლილია მაგრამ გულდასაწყვეტია მწვრთნელის არასწორი სტრატეგიის გამო ქულები დავკარგეთ სახლში.