"დონალდ ტრამპის მესიჯები იყო იგივე, რაც "ქართული ოცნების" კამპანიის დროს გვხვდებოდა" - ვახტანგ ჩოჩია

მმართველ გუნდს ამერიკის ახალი პრეზიდენტის მხარდაჭერის იმედი აქვს. ამ მოლოდინს, "ქართული ოცნების" განმარტებით, ამყარებს ინაუგურაციის შემდეგ წარმოთქმული სიტყვა, სადაც ტრამპმა საქართველოს საპარლამენტო უმრავლესობისთვის აქტუალური და მნიშვნელოვანი თემები წამოწია. დონალდ ტრამპი გლობალური მშვიდობის გარანტია - აცხადებენ მმართველ გუნდში."დონალდ ტრამპის მიერ აშშ-ის მოსახლეობისა და მსოფლიოს წინაშე გაგზავნილი მესიჯები იყო იგივე, რაც "ქართული ოცნების" კამპანიის დროს გვხვდებოდა. ძალიან დადებითად არის შესაფასებელი მის მიერ გადადგმული ქმედითი ნაბიჯები. დარწმუნებული ვარ, რომ სწორედ ეს გახდება იმის წინაპირობა, რომ ჩვენ მოვხსნათ ის უხერხულობა, რომელიც შექმნა წინა ადმინისტრაციამ საქართველოსთან ურთიერთობაში და განვამტკიცოთ ჩვენი არსებული, სტრატეგიული პარტნიორობა და კიდევ უფრო მაღალ დონეზე ავიყვანოთ ჩვენი ურთიერთობები", - აცხადებს საპარლამენტო უმრავლესობის ლიდერის კაბინეტის უფროსი ვახტანგ ჩოჩია.