დაკავებული მომიტინგეების ოჯახები საზოგადოებრივი მაუწყებლისგან საეთერო დროს და სასამართლო პროცესის პირდაპირ ეთერში გაშუქებას ითხოვენ

პროევროპული საპროტესტო აქციების დროს დაკავებულთა ოჯახის წევრებმა საქართველოს საზოგადოებრივ მაუწყებელს  სამი დღის მანძილზე პირდაპირი ეთერის გამოყოფისა და მიმდინარე სასამართლო პროცესების პირდაპირ ეთერში გაშუქებისკენ მოუწოდეს. ოჯახებმა ხაზგასმით აღნიშნეს, რომ „მხოლოდ საზოგადოებრივ მაუწყებელს გააჩნია სასამართლო პროცესების ვიდეოგადაღების უფლებამოსილება, რაც განსაკუთრებით მნიშვნელოვანია პროცესების გამჭვირვალობისა და საზოგადოების სამართლიანი ინფორმირების უზრუნველყოფისათვის“.

29 აპრილს საზოგადოებრივი მაუწყებლის წინ გამართულ აქციაზე, ოჯახებმა განაცხადეს, რომ უზარმაზარი სისტემური რესურსია ჩართული იმ ინფორმაციის გავრცელებაში, რომელიც მათ დისკრედიტაციას ახდენს და რომ საზოგადოებრივი მაუწყებელი ვალდებულია დაეხმაროს მათ, ხმა მიაწვდინონ საზოგადოებას.

ერთობლივ განცხადებაში ოჯახებმა ხაზი გაუსვეს, რომ მათი მოთხოვნები ემყარება საზოგადოებრივი მაუწყებლის სტატუტურ მიზნებს – უზრუნველყოს მაღალი საზოგადოებრივი ინტერესის მქონე საკითხების სრულფასოვანი გაშუქება, დამოუკიდებლობის, მიუკერძოებლობისა და ობიექტურობის პრინციპების დაცვით.

„მოთხოვნების შეუსრულებლობის შემთხვევაში, ჩვენ ვიქნებით იძულებული, საკითხი გადავცეთ საერთაშორისო საზოგადოებრივი მაუწყებლობის მონიტორინგის ორგანიზაციებს, მათ შორის Public Media Alliance-ს, ასევე მივმართოთ ევროპარლამენტს, ევროპის საბჭოს მედიის თავისუფლების დეპარტამენტს, საერთაშორისო ჟურნალისტთა ფედერაციას (IFJ) და სხვა შესაბამის გავლენიან ინსტიტუტებს, რათა სათანადო ყურადღება მიაქციონ საქართველოს საზოგადოებრივი მაუწყებლის მიერ საზოგადოებრივი ინტერესების და სამართლიანი ინფორმირების ვალდებულებების შესაძლო დარღვევას“, – აცხადებენ ისინი.

საზოგადოებრივი მაუწყებლის კრიტიკა 2024 წლის 28 ნოემბრის შემდეგ გაძლიერდა, როდესაც მაუწყებელმა ვერ შეძლო ევროკავშირის მხარდამჭერი საპროტესტო აქციების, განსაკუთრებით დემონსტრანტების მიმართ პოლიციის ძალადობის შემთხვევების სათანადოდ გაშუქება. მაუწყებლის შეზღუდულ გაშუქებას მისი შენობის წინ აქციები მოყვა, სადაც აქტივისტები საეთერო დროს ითხოვდნენ. უკვე 152 დღეა მომიტინგეები ყოველდღიურად იკრიბებიან – მათი ნაწილი საზოგადოებრივი მაუწყებლის წინ იკრიბება და შემდეგ მსვლელობით რუსთაველის გამზირზე მიდის.

მიუხედავად იმისა, რომ საზოგადოებრივმა მაუწყებელმა აქტივისტებს გარკვეული საეთერო დრო გამოუყო, არხის ხელმძღვანელობაში არანაირი მნიშვნელოვანი რეფორმა არ განხორციელებულა. გარდა ამისა, რამდენიმე თანამშრომელი, რომლებმაც სამეურვეო საბჭოს სხდომების პირდაპირი ტრანსლაციის დროს არაერთხელ გამოთქვეს შეშფოთება სარედაქციო დამოუკიდებლობის არარსებობის შესახებ და გააკრიტიკეს საზოგადოებრივი მაუწყებლის მენეჯმენტი, სამსახურიდან გაათავისუფლეს.

2022 წლის 21 აპრილს, საზოგადოებრივი მაუწყებლის სამეურვეო საბჭომ სამწლიანი ვადით ახალ თავმჯდომარედ „ქართული ოცნების“ მიერ დანიშნული წევრი ვასილ მაღლაფერიძე აირჩია. მანამდე ის საზოგადოებრივი მაუწყებლის გენერალური დირექტორის პოსტს იკავებდა. კოალიციამ მედიის ადვოკატირებისთვის მაშინ განაცხადა, რომ სამეურვეო საბჭოს წევრად ვასილ მაღლაფერიძის არჩევა „მნიშვნელოვან რეპუტაციულ ზიანს მიაყენებს მიუკერძოებელი საზოგადოებრივი მაუწყებლის შექმნის იდეას და შეამცირებს საზოგადოების მიერ დაფინანსებული არხების პოლიტიკური დამოუკიდებლობის შესაძლებლობას“. მაღლაფერიძე 2021 წლის იანვარ-მარტში „ქართული ოცნების“ თავმჯდომარის მოადგილის თანამდებობას იკავებდა.

ასევე წაიკითხეთ:

• 24/03/2025 – საზოგადოებრივი მაუწყებელი კრიტიკას უარყოფს და კრიტიკოსებს ცრუ ბრალდებებში ადანაშაულებს
• 05/02/2025 – საზოგადოებრივმა მაუწყებელმა საინფორმაციო გადაცემის კრიტიკული წამყვანი ეთერიდან მოხსნა
• 30/01/2025 – მიმდინარე საპროტესტო აქციების ფონზე საზმაუს ხელმძღვანელობა კრიტიკის ქარცეცხლში მოექცა
• 18/12/2024 – პრეზიდენტის ადმინისტრაცია: საზმაუ არ ახდენს საზოგადოების სრულყოფილ და ობიექტურ ინფორმირებას პრეზიდენტის შესახებ
• 03/12/2024 – საზოგადოებრივი მაუწყებლის თანამშრომლები „ქართული ოცნების“ გადაწყვეტილებას ემიჯნებიან და არხს მიკერძოებულს უწოდებენ
• 22/12/2023 – მედია კოალიცია დამოუკიდებლობის დაკარგვის გამო საზოგადოებრივ მაუწყებელს აკრიტიკებს