არქიმანდრიტი ილია ჯინჯოლავა: რაც ყველაზე შემაშფოთებელია – ამას იდეოლოგიით ამართლებენ – “აბა, ომი გინდა?!” თითქოს ომი უკვე არ მიდის – ომი სიმართლესა და სიცრუეს შორის

ეს არ არის უბრალოდ კრიმინალი — ეს არის სულიერი კატასტროფა, რომელსაც საზოგადოებრივი ცნობიერების გაკოტრება უდგას საფუძვლად. ადამიანებს უკვე აღარ უკვირთ ბოროტება, არც უწევენ წინააღმდეგობას, ხშირად არც აღშფოთდებიან, ზოგჯერ კი — ამართლებენ, რადგან “ძალა უყვართ”, “მართლად აღიქვამენ” და რაც ყველაზე შემაშფოთებელია — ამას იდეოლოგიით ამართლებენ — “აბა, ომი გინდა?!” თითქოს ომი უკვე არ მიდის — ომი სიმართლესა და სიცრუეს შორის, სინდისსა და ფულის ძალას შორის, სიცოცხლესა და სიკვდილის კულტს შორის.

კი, ძნელია ამ სიბნელეში სინათლის რწმენის შენარჩუნება, მაგრამ ჩვენ არ გვაქვს უფლება დავნებდეთ. სიმშვიდე, სიმართლე და სამართლიანობა — ქრისტიანის გზა სწორედ ამ ღირებულებების დაცვისკენ მიდის. ვინც პატიოსნად ცხოვრობს, ვინც არ ძალადობს, ვინც სინდისს იცავს — ის უკვე გმირია ამ სამყაროში.

არავინაა დაბადებული მოძალადედ. ყველამ შეიძლება შეინანოს, მაგრამ სანამ საზოგადოება ხმას არ ამოიღებს და არ იტყვის: „ეს არ არის ნორმალური! ეს ჩვენი სულიერი დაცემა და მარცხია!“ — მანამდე ეს ტანჯვა გაგრძელდება.

არა ძალადობას. არა სიცრუეს. არა შიშზე აგებულ სახელმწიფოს.

ჰო მშვიდობას, ჰო სინდისს, ჰო საღმრთო სიმართლეს — რომელიც მხოლოდ მაშინ დაისადგურებს, როცა ჩვენ არ შეგვეშინდება ვთქვათ: “დროა ადამიანურობისა!”” –  წერს სოციალურ ქსელში არქიმანდრიტი ილია ჯინჯოლავა.