კობახიძე ოპოზიციური პარტიების გაუქმებით “საკონსტიტუციო უმრავლესობის გარეშეც” იმუქრება

პრემიერმინისტრი ირაკლი კობახიძე ოპოზიცური პარტიების გაუქმებით ისევ იმუქრება. კობახიძე არ გამორიცხავს, რომ შესაბამისი გადაწყვეტილება საკონსტიტუციო უმრავლესობის გარეშე მიიღონ.

ის ოპოზიციურ პარტიებს, რომლებიც არჩევნების შედეგებს არ აღიარებენ, “კონსტიტუციური წყობილების წინააღმდეგ წასვლაში” ადანაშაულებს.

“ჩვენ გვქონდა წინასაარჩევნო პერიოდში საუბარი პოლიტიკური პარტიების არაკონსტიტუციურად გამოცხადებაზე. ჩვენ ამას ვუკავშირებდით საკონსტიტუციო უმრავლესობის მიღებას, თუმცა თუ ასე გააგრძელეს ამ ადამიანებმა, შეიძლება საკონსტიტუციო უმრავლესობის გარეშეც გადავდგათ ეს ნაბიჯი.
თუ ისინი გააგრძელებენ კონსტიტუციური წყობილების წინააღმდეგ წასვლას, ამ შემთხვევაში ისინი მოამწიფებენ შესაბამის გადაწყვეტილებას, თუმცა კიდევ ერთხელ გავიმეორებ, რომ ამის რესურსი მათ ნაკლებად აქვთ, შესაბამისად, მგონია, რომ ძალიან მალე ისინი გაჩერდებიან, შესაბამის ინსტრუქციებსაც მიიღებენ და საბოლოო ჯამში, არ ვიცი სამწუხაროდ თუ საბედნიეროდ, ისინი აღმოჩნდებიან პარლამენტში სკამებზე. აქ საუბარია საკონსტიტუციო სარჩელის შეტანაზე, რასაც სჭირდება დეპუტატების მცირე რაოდენობა. ეს არის აბსოლუტურად საკმარისი.
თუ გააგრძელებენ კონსტიტუციური წყობილების წინააღმდეგ სიარულს, ამ შემთხვევაში შეიძლება განვიხილოთ ჩვენ ეს საკითხი. მეორე მხრივ, იმდენად დასუსტებულია დღეს ოპოზიცია, რომ შეიძლება ასეთი ზომების მიღება აღარც გახდეს აუცილებელი, თუმცა ცუდი არ იქნებოდა ქვეყნის გრძელვადიანი სტაბილური განვითარებისთვის”, – თქვა ირაკლი კობახიძემ.
***
მთელი წინასაარჩევნო კამპანიის პერიოდში ქართული ოცნების ლიდერები, მათ შორის პარტიის დამფუძნებელი, ბიძინა ივანიშვილი ოპოზიციური პარტიების გაუქმებით იმუქრებოდნენ. მათ შორის ნაციონალური მოძრაობისთვის “ნიურნბერგის პროცესის” მოწყობას აპირებდნენ.